Bull Fight Goa

मडगाव: बेताळभाटी येथे आयोजित धीरयोत एक बैल मृत्युमुखी पडला. सोमवारी (ता.२८) ही घटना घडली. या झुंजीत ३० लाखांचा सट्टा लावण्यात आला होता. यात आयोजकांनी दोन मातब्बर बैल रिंगणात उतरविले होते. दरम्यान, धीरयो आयोजित केल्याप्रकरणी आता कोलवा पोलिस स्थानकात गुन्हा नोंद करण्यात आला आहे.

बैलाचा मृत्यू झाल्यानंतर आयोजकांनी धीरयो आटोपता घेऊन बघ्यांनाही परत पाठविले. मागाहून धीरयोचा बैलाचा मृत्यू झाल्याची बातमी पसरल्यानंतर पोलिसांचीही तारांबळ उडाली. कोलवा व वेर्णा पोलिस ठाण्याचेही पोलिस घटनास्थळी पोहोचले.

पुढील पोलिस तपास सुरू आहे. बैलांच्या झुंजेचा एक व्हिडिओ समोर आला असून, बैलांची झुंज सुरु असताना सभोवताली मोठ्या प्रमाणावर बघ्यांची गर्दी पाहायला मिळत आहे.

बैलांची झुंज सुरु असताना एक बैल अधिक आक्रमक झाला व दुसऱ्या बैलावर जोरदार प्रहार केला. यात दुसरा बैल गंभीर जखमी झाल्याचे दिसत आहे. जखमी झालेल्या या बैलाचा मृत्यू झाल्याने खळबळ निर्माण झाली आहे. पोलिसांनी याप्रकरणी गुन्हा नोंद करत आता तपास सुरु केला आहे.

दरम्यान, सासष्टीत मोठ्या प्रमाणात या दिवसांत धीरयोंचे आयोजन केले जात असून, त्यावर कारवाई करण्यास पोलिसांना मात्र अपयश येत आहे.