वेर्णा ते मुरगाव बंदरापर्यंत राष्ट्रीय महामार्गाच्या बाजूला कचऱ्याबरोबर वाहन पार्किंग समस्येत वाढ झाली आहे. वास्को वरुणापुरी, गांधीनगर महामार्गाच्या बाजूस कचऱ्याच्या ढीगाऱ्यामुळे सर्वत्र दुर्गंधी पसरली आहे. वाढत्या कचऱ्याबरोबर वाहन पार्किंग करणार्‍यांवर राष्ट्रीय महामार्गावर प्राधिकरणाने त्वरित कारवाई करावी, अशी मागणी वाहनचालकांबरोबर नागरिकांकडून होत आहे. (Increase in waste and parking problems on Verna-Mormugao National Highway Demand for action

वेर्णा (Verna) ते मुरगाव बंदरापर्यंत पूर्ण झालेल्या राष्ट्रीय महामार्गामुळे (National Highway) अवजड वाहनांबरोबर इतर वाहनांची चांगली सोय झाली आहे. मात्र दाबोळी विमानतळ, वास्को, शांतीनगर, मांगुरहिल, वरुणापुरी, गांधीनगर येथील महामार्गाच्या बाजूस सर्रासपणे वाहने पार्क करून राष्ट्रीय महामार्गाच्या नियमांचे उल्लंघन अनेक वाहनचालक करीत आहे. यावर राष्ट्रीय महामार्ग प्राधिकरणाबरोबर वास्को वाहतूक पोलिसांनी कारवाई करावी अशी मागणी होत आहे. महामार्गावर वाहन पार्किंगमुळे अपघातात वाढ होत असून यावर त्वरित कडक कारवाई संबंधित विभागाने करणे अत्यंत गरजेचे आहे.

दरम्यान दाबोळी विमानतळ महामार्ग, शांतीनगर ते मांगुरहिल, वरुणापुरी, गांधीनगर या ठिकाणी महामार्गाच्या बाजूस रस्त्यावर कचरा टाकत असल्याने मोठ्या प्रमाणात कचऱ्याचे ढिगारे तयार झाले आहे. यामुळे तिथे भटकी गुरे, कुत्र्यांच्या प्रमाणात वाढ झाल्याने नागरिकांमध्ये भीतीचे वातावरण पसरले आहे. सदर महामार्गावर असलेल्या कचऱ्यामुळे वाहन चालकांबरोबर पादचाऱ्यांना धोका निर्माण होण्याची शक्यता असल्याने राष्ट्रीय महामार्ग प्राधिकरणाने कचरा उचलण्यावर उपाययोजना आखावी, अशी मागणी होत आहे.