Income Tax Raid in Goa : मडगाव पालिकेचे माजी नगरसेवक कुदबुद्दीन बागेवाडी आणि त्यांचा रियल इस्टेट व्यवसायातील भागीदार अल्ताफ सय्यद यांच्या घरावर आयकर खात्याने धाड टाकली आहे. आज बुधवारी सकाळी आयकर विभागाने गोव्यातील बिल्डरवर धाडी घातल्याने संपूर्ण मडगाव येथे तो चर्चेचा विषय बनला आहे. दुपारी उशिरापर्यंत आयकर खात्याची ही कारवाई चालू होती.

आयकर विभागाने आज बुधवारी सकाळी ही धडक कारवाई केली. मनोविकास शाळेजवळ असलेल्या अल्ताफ सय्यद तसेच घोघळ हाउसिंग बोर्ड येथे असलेल्या बागेवाडी यांच्या घरावर ही धाड घालण्यात आली. या कारवाईत कुणाचा व्यत्यय येऊ नये यासाठी दोन्ही बिल्डरांचा घराबाहेर मोठा पोलीस बंदोबस्त ठेवण्यात आला होता.

ही कारवाई आज सकाळी आठ वाजता सुरू करण्यात आली होती. दुपारपर्यंत कारवाई चालूच होती. ही कारवाई नेमकी कशासाठी केली गेली त्याची माहिती मिळाली नाही. मात्र आयकर खात्याच्या धाडीमुळे गोव्यातील अनेक बिल्डर लोकांचं मात्र धाबं दणाणलं आहे.