वाळपई: येथील वाळपई - नगरगाव या मुख्य मार्गावर नवीनच सुरू झालेल्या डॉ. केशव हेडगेवार विद्यालयासमोरील रस्त्यावर आता रस्ता विभागाने गतिरोधक घालण्याची नितांत गरज आहे. हा प्रमुख मार्ग असल्याने या रस्त्याने मोठ्या प्रमाणात वाहनांची ये - जा सुरू असते. अशावेळी भरधाव वेगाने गाडी चालविणे नित्याचेच बनले आहे. या विद्यालयात जाण्यासाठी पालक वर्ग मुलांना घेऊन रस्ता ओलांडत असतात.

त्यावेळी दोन्ही बाजूंनी वाहनांची वर्दळ सुरू असते. वाहनांच्या वेगाला नियंत्रण येण्यासाठी या ठिकाणा गतिरोधक आवश्यक बनला आहे. मुलांच्या सुरक्षिततेच्या बाबतीत रस्ता विभागाने तत्काळ कार्यवाही करीत या विद्यालयासमोरील रस्त्यावर दोन्ही ठिकाणी गतिरोधक घालण्याची प्रक्रिया केली पाहीजे. ज्या ठिकाणी शाळा असतात, त्या ठिकाणी गतिरोधकांची बांधणी जरुरीची आहे. त्यामुळे सरकारच्या वाळपई रस्ता बांधकाम विभागाने त्वरित हालचाली करण्याची गरज आहे.