पणजी: गोव्यात (Goa) जवळपास दोन लाख पीएफ (PF) वापरात आहेत. त्‍यातील ११,३३१ जणांनी अजूनही पीएफची पूर्ण प्रक्रिया (Process) केलेली नाही. या सर्वांची केवायसी (KYC), कुटुंबाची माहिती, आधारकार्ड व मोबाईल नंबर एकमेकांशी जोडणे (लिंक) राहून गेले आहे. त्यामुळे लोकांनी पुढे येऊन या गोष्टी लवकरात लवकर पूर्ण कराव्‍यात, असे आवाहन पीएफचे प्रादेशिक आयुक्त अश्विनीकुमार गुप्ता (Ashwini Kumar Gupta) यांनी येथे आयोजित पत्रकार परिषदेत केले. यावेळी त्यांच्यासोबत प्रादेशिक आयुक्त अतुल कोटकर (Atul Kotkar) व योगेंद्र सिंग शेखावत (Yogendra Singh Shekhawat) उपस्थित होते.

सर्वसामान्यांसाठी पीएफ खूप गरजेचा असतो. अशा वेळी लोकांना फसवून त्यांचे पैसे हडप करण्याचे प्रकार वाढले आहेत. त्यामुळे लोकानी अशा गोष्टींना बळी न पडता थेट पीएफ कार्यालयाला भेट द्यावी व प्रक्रिया पूर्ण करावी, असे आवाहन गुप्ता यांनी केले. ‘आझादी का अमृतमहोत्सव’निमित्ताने कुटुंबाची माहिती अपलोड करण्यासाठी ऑनलाईन सुविधा उपलब्ध करण्यात आली आहे, जेणेकरून लोकांना सोयीचे होईल, असे कोटकर म्‍हणाले.