पणजी: राज्यातील पारंपरिक फळ उद्योगाला प्रोत्साहन देण्याबरोबर फळ उत्पादक शेतकऱ्यांना बाजारपेठ उपलब्ध व्हावी, यासाठी ‘बॉटनीकल सोसायटी ऑफ गोवा’ यांच्यातर्फे पणजीत आजपासून कोकण फळ महोत्सवाला सुरवात झाली.

आंबा, काजू, फणस, केळी या प्रमुख फळांबरोबर चिक्कू, जांभूळ, करवंदे, जाम, नारळ यांसारख्या फळांच्या उत्पादनाला प्रोत्साहन देण्यासाठी 2003 पासून पणजीत बॉटनिकल सोसायटी ऑफ गोवाच्यावतीने या महोत्सवाचे आयोजन करण्यात आले आहे.

यंदा मांडवी किनाऱ्यावर भरलेल्या या महोत्सवात शेतकऱ्यांसोबत धारवाड कृषी संशोधन विद्यापीठ, वेंगुर्ला फळ संशोधन केंद्र, गोवा कृषी संचालनालय, औषधी वनस्पती मंडळ गोवा, गोवा वन विभाग, डॉन बॉस्को कृषी केंद्र, ‘आयसीएआर’ यांसारख्या शैक्षणिक संस्था सहभागी झाल्या आहेत. या ठिकाणी फळांच्या प्रदर्शनाबरोबर फळझाडांची रोपे, खतांची मात्रा, फळ लागवड यावर मार्गदर्शनपर चर्चासत्रे आयोजित केली आहेत. याशिवाय विविध स्पर्धाही घेण्यात येणार आहेत.

आंबा खरेदीसाठी गर्दी

या फळ महोत्सवात पारंपरिक पद्धतीने पिकवलेली सेंद्रीय फळे उपलब्ध असून, प्रामुख्याने मानकुराद, हापूस याबरोबर देशी आंबे उपलब्ध आहेत. यात मानकुराद आंबा खरेदीसाठी नागरिकांनी केली होती. सर्वसाधारपणे या महोत्सवात 400 ते 500 रुपये डझन याप्रमाणे आंब्याची विक्री झाली.