Swindon Council gets first Goan, Indian Dy Mayor: गोव्यातील लोक जगातील विविध देशात विखुरले आहेत. युकेमधील विविध प्रांतात प्रामुख्याने अनेक गोमन्तकीय वास्तव्यास आहेत. असेच, इंग्लंडमधील स्विंडन येथून गोवा आणि भारतासाठी अभिमानास्पद घटना समोर आली आहे. ब्रिटनमधील स्विंडन परिषदेत प्रथमच भारतीय व्यक्तीला उपमहापौरपद मिळाले आहे.

वास्को येथील रहिवाशी असलेले इम्तियाज शेख यांची स्विंडन परिषदेत उपमहापौरपदी निवड झाली आहे. शुक्रवारी बार्बरा पॅरी यांची स्विंडन कौन्सिलच्या महापौरपदी नियुक्ती करण्यात आली त्यानंतर शेख यांची उपमहापौरपदी वर्णी लागली आहे. दरम्यान, इम्तियाज शेख यांच्याकडे कोणते खाते दिले जाणार याबाबत अद्याप माहिती समोर आलेली नाही.

विशेष योगायोगाची बाब म्हणजे इम्तियाज शेख यांच्या पत्नी अदोराबेले अमरल-शेख यांना मंत्रिमंडळात स्थान देण्यात आले असून, त्यांच्याकडे शिक्षण विभागाची जबाबदारी असेल.

अदोराबेले अमरल-शेख स्विंडन येथील स्थानिक बरो निवडणुकीत सेंट्रल वॉर्ड येथून पुन्हा नगरसेवक म्हणून निवडून आल्या आहेत. शिवाय इम्तियाज शेख यांची उपमहापौरपदी निवड झाल्यामुळे त्यांच्या पत्नी अदोराबेल यांना उपमहापौर म्हणून संबोधले जाईल.

दरम्यान, पती-पत्नी दोघांनी या नियुक्तीबद्दल स्विंडन परिषद आणि तेथील नागरिक व लोक प्रतिनिधींचे आभार मानले आहेत.

'स्विंडनच्या उपमहापौरपदी माझी नियुक्ती केल्याबद्दल साऊथ स्विंडन लेबर पार्टी, सहकारी स्विंडन लेबर कौन्सिलर्स आणि चेंबरचे सहकारी नगरसेवक यांचे आभार मानतो.' असे इम्तियाज शेख यांनी म्हटले आहे.