पणजी: सातिस्मोवाडा-ताळगाव येथे बेकायदा डोंगरकापणी करून पर्यावरणाचा नाश केल्याप्रकरणाची तक्रार काँग्रेसचे नेते टोनी फर्नांडिस यांनी आज वन खात्याकडे केली. या प्रकरणाची चौकशी करून त्यात गुंतलेल्यांविरुद्ध गुन्हा दाखल करण्याची मागणी तक्रारीत करण्‍यात आली आहे. डोंगर कापून हा रस्ता कोणत्याही परवान्याशिवाय एका खासगी बांधकामासाठी करण्यात आला असल्याचा आरोप त्यांनी केला आहे.

सांपॉल येथील चर्चकडून आशा महलकडे जाणाऱ्या व सुप्रीमो इमारतीच्या उजव्या बाजूला एक खासगी बांधकाम सुरू आहे. या बांधकामासाठी डोंगर कापून सुमारे 15 मीटरचा रस्ता करण्यात येत आहे. हा रस्ता डोंगरामाथ्यापर्यंत करण्यात आला आहे. या ठिकाणी अलिशान बंगलावजा घराचे काम सुरू आहे. हा रस्ता फक्त या बंगल्यासाठीच करण्यात येत असल्याचा दावा तक्रारदार फर्नांडिस यांनी केला आहे. विशेष म्‍हणजे हे बांधकाम ताळगाव पंचायतीपासून सुमारे 100 मीटर अंतरावर सुरू असताना पंचायतीने डोळे मिटून घेतले आहेत. डोंगरकापणीमुळे तेथे दरड कोसळण्याची तसेच माती खाली येण्याची शक्यता आहे. त्यामुळे त्या भागातील घरांना धोका संभवू शकतो, असेही तक्रारीत म्हटले आहे. दरम्‍यान, वन खात्याकडे तक्रार दाखल करताना टोनी फर्नांडिस यांच्‍यासमवेत माजी महापौर व नगरसेवक उदय मडकईकर तसेच काँग्रेसचे ताळगावचे कार्यकर्ते उपस्थित होते.