राज्यात अनेक ठिकाणी बेकायदेशीररीत्या उभारलेल्या रोपवाटिकांवर कृषी खात्याला कायद्याअंतर्गत कारवाईचा अधिकार असून ते कारवाई करत नाहीत. या रोपवाटिकांमध्ये विक्री केली जाणारी रोपट्यांमध्ये कमी दर्जाची गुणवत्ता असलेल्यांचा समावेश असल्याने याचे दुष्परिणाम मातीच्या प्रजनन क्षमतेवर होत आहे.

त्यासाठी कृषी खात्याने त्वरित कारवाई केली पाहिजे, अशी मागणी आरजीचे प्रमुख मनोज परब यांनी केली. पणजी येथे ते पत्रकारांशी बोलत होते. परब यांनी आज कृषी खात्याचे संचालक नेव्हील अल्फोन्सो यांची भेट घेऊन बेकायदेशीरीत्या उभारलेल्या रोपवाटिकासंदर्भात त्यांना माहिती दिली.

एकदा ही रोपटी आणून रोपण केल्यानंतर याचे गंभीर परिणाम मातीवर होतात. हा विषय कृषी संचालकासमोर मांडल्यानंतर यासंदर्भात सर्व तालुक्यातील क्षेत्रीय अधिकाऱ्यांना अहवाल करून पाठवण्याचे निर्देश देणार असल्याचे आश्‍वासन अल्फोन्सो यांनी परब यांना दिले.