मडगाव : उत्पादकांचे नाव नाही, निर्यातदाराचे नाव नाही, मालाची व्यवस्थित किंमत लिहिलेली नाही, उत्पादन तारीख नाही. अशा प्रकारे सर्व नियम धाब्यावर बसवून मडगाव व जवळपासच्या भागात सुपर स्टोअर्समध्ये विकला जाणारा माल आज वजन व माप खात्याने एका कारवाईत जप्त केला. आज जागतिक ग्राहक हक्क दिनानिमित्त ही कारवाई करण्यात आली. (Illegal items sold in supermarkets around Madgaon were seized)

मडगाव (Margao) येथील विशाल मेगा मार्टसह एकूण पाच बड्या स्टोअर्सवर कारवाई करून हा माल जप्त करण्यात आला. किमान 100 वेगवेगळ्या प्रकारचे पदार्थ आणि वस्तू जप्त करण्यात आल्याची माहिती या खात्याचे दक्षिण गोव्याचे उप नियंत्रक नितीन पुरुशन यांनी दिली.

यात मडगाव (Margao) तसेच कोलव्यातील स्टोर्सचा समावेश होता. या स्टोअर्समध्ये कित्येक दुसऱ्या देशातून आयात केलेल्या वस्तू ज्यात विशेषतः चॉकलेट्स (Chocolates) व सिगारेट्सचा (Cigarettes) समावेश होता.

मात्र या उत्पादनावर उत्पादनाची तारीख, उत्पादकाचे नाव, या वस्तू कुठल्या देशातून आयात करण्यात आल्या. त्या आयातदाराचे (Import) नाव अशी कोणतीही माहिती नव्हती. वजन व माप खात्याच्या नियमानुसार अशा वस्तू विकताना ही सारी माहिती नमूद करणे आवश्यक असते अशी माहिती पुरुशन यांनी दिली.

या संबंधी गोवा कॅन (Goa Can) या ग्राहक हक्का संबंधी लढणाऱ्या संघटनेने तक्रार केली होती. कोलवा येथील इकबालस या स्टोअर्सवरही छापा मारून वस्तू पकडल्या अशी माहिती गोवा कॅनने दिली.