मडगाव: माडेल-फातोर्डा येथील नागरिकांकडून तसेच सावियो डायस यांच्याकडून तेथे उघड्यावर बेकायदेशीर मासेविक्री होत असल्याची तक्रार करण्यात आली होती. या तक्रारीची दखल घेत मडगाव आरोग्य केंद्राने १३ ऑगस्ट रोजी सकाळी सदर स्थळी पाहणी केली होती. त्यावेळी आढळून आलेल्या निरीक्षणांच्या आधारे कारवाई करण्याचे निर्देश मडगाव पालिकेला देण्यात आले आहेत.

या पाहणीत आरोग्य केंद्र पथकाला ४ ते ५ मासे व्यापारी माडेल, फातोर्डा येथील मोकळ्या जागेचा वापर करत असल्याचे आणि सदर प्लॉटमध्ये सुमारे डझनभर मासळी वाहतूक करणारी वाहने पार्क केल्याचे आढळून

आले होते. सध्या सदर केंद्राने डासांची संभाव्य पैदास स्थाने आढळून आलेल्या ठिकाणी अळ्यांविरुद्ध उपाययोजना केल्या आहेत.

सदर ठिकाणी थर्माकोल बॉक्स आणि प्लास्टिक बॉक्स-क्रेट हे मोकळ्या जागेत साठवले वा टाकले जातात. ते डासांच्या पैदाशीचे संभाव्य स्रोत आहेत. त्यामुळे परिसरातील लोकांच्या आरोग्याला धोका निर्माण होऊ शकतो. गोवा सार्वजनिक आरोग्य कायद्यानुसार, आणि स्वच्छतेच्या आरोग्य दृष्टिकोनातून हा एक उपद्रव आहे.

फातोर्डातील प्रकरणाची दखल घ्यावी

फातोर्डातील या प्रकरणाची तातडीने दखल घ्यावी. संबंधित अधिकाऱ्यांना सदर उपद्रव कमी करण्यासाठी आवश्यक असलेल्या उपाययोजना करण्याचे निर्देश द्यावेत, तसेच कारवाईचा अहवाल तक्रारदाराला पाठवावा, असे मुख्याधिकाऱ्यांना आरोग्य केंद्राकडून पाठविण्यात आलेल्या नोटिशीत स्पष्ट करण्यात आले आहे.