सासष्टी: मडगाव न्यू मार्केट ट्रेडर्स असोसिएशनचे अध्यक्ष गोपाळ नाईक यांनी न्यू मार्केटमध्ये चालू असलेल्या बेकायदा बांधकामांकडे पालिका त्याकडे दुर्लक्ष करीत असल्याबद्दल नाराजी व्यक्त केली. तसेच न्यू मार्केटमधील दुकाने बेकायदा परस्पर दुसऱ्यांना विकण्याचे प्रकार वाढले असल्याने त्यांनी चिंता व्यक्त केली.

गोपाळ नाईक यांनी असोसिएशनच्या पदाधिकाऱ्यांसमवेत मुख्य अधिकारी मेल्विन वाझ यांची भेट घेतली असून या बेकायदा बांधकामाबद्दल निवेदन सादर केले आहे. आपण न्यू मार्केटमधील बेकायदा दुरुस्ती, बांधकाम, विक्रीची प्रकरणे पालिकेच्या निदर्शनास आणून दिली. मात्र त्यावर काहीही कारवाई केली जात नाही, असे गोपाळ नाईक यांचे म्हणणे आहे.

हे प्रकार थांबविण्यासाठी पालिकेकडून ठोस पावले उचलणे आवश्यक असल्याचे नाईक सांगतात. जे कोण या बेकायदा बांधकामात गुंतलेले आहेत, त्यांना काहीही विचारल्यास ते शिवीगाळ करतात, उद्धटपणे वागतात, असे त्यांचे म्हणणे आहे.