मडगाव: खोल पंचायत क्षेत्रातील १०७/१७ या सर्व्‍हे क्रमांकाच्‍या जागेत याच पंचायतीचे पंचसदस्‍य अजय विठोबा पागी यांच्‍याकडून बेकायदा बांधकाम चालू असल्‍याची तक्रार श्रीनिवास पुरुषोत्तम नायक यांनी केल्‍यानंतर १९ सप्‍टेंबर रोजी पंचायतीने या काम बंदची नोटीस बजावून ७ दिवसांत स्‍पष्‍टीकरण द्या, असा आदेश पागी यांना दिला होता.

हा आदेश जारी करून महिना उलटूनही पंचायतीकडून कोणतीच कारवाई झालेली नाही. अद्यापही हे अवैध बांधकाम चालू आहे, असा दावा नायक यांनी केला आहे.

यासंदर्भात तक्रारदार नायक यांनी माहिती हक्‍क कायद्याखाली माहिती मागवली होती. ३ सप्‍टेंबर रोजी त्‍यांना दिलेल्‍या माहितीत सदर बांधकाम अजय विठोबा पागी आणि तेजल अजय पागी यांच्‍या मालकीच्‍या जागेत असून या जागेत कुठलेही बांधकाम उभारण्‍यास पंचायतीने कसलाही परवाना दिलेला नाही, हे स्‍पष्‍ट केले आहे.

अजय पागी व तेजल पागी यांना परवाना देण्‍याचा कुठलाही ठराव पंचायतीने पास केलेला नाही, असेही म्‍हटले होते. याच संदर्भात दाखल केलेल्‍या आणखी एका आरटीआय अर्जाला ३० सप्‍टेंबर रोजी उत्तर देताना, सदर बांधकाम हे बेकायदेशीर असल्‍याचे लक्षात आल्‍यानंतर पंचायतीने ते बंद करण्‍यासाठी नोटीस जारी केली आहे, असे उत्तर देण्‍यात आले आहे.

पंचायतीचा बांधकाम परवाना नसल्याचा आरोप

वाघण-तळप या जागेवर हा दुमजली बंगला उभारला जात असून हे बांधकाम करताना त्‍यासाठी आवश्‍‍यक असलेले तांत्रिक परवाना, कन्‍वर्झन सनद तसेच हे बांधकाम करण्‍यासाठी पंचायतीकडून कुठलाही परवाना घेतला नसल्‍याचे या तक्रारीत म्‍हटले आहे.

ज्‍या पंच सदस्‍याकडून हे बांधकाम केले जाते, त्‍यांचीच पत्‍नी या पंचायतीत सध्‍या उपसरपंच म्‍हणून काम करत आहे. यामुळेच याबाबतीत पंचायतीकडून चालढकल होत असल्‍याचा आरोप तक्रारदाराने केला आहे.