पणजी: गोवा आता ५६ व्या भारतीय आंतरराष्ट्रीय चित्रपट महोत्सवाच्या आयोजनासाठी सज्ज झाला आहे. मुख्यमंत्री डॉ. प्रमोद सावंत यांनी दि. १० रोजी या महोत्सवाच्या तयारीचा आढावा घेण्यासाठी एक बैठक घेतली. २० ते २८ नोव्हेंबर दरम्यान गोव्यात रंगणाऱ्या या भव्य महोत्सवासाठी यंदा अनेक नवीन आकर्षणे आणि विक्रम नोंदवले जाणार आहेत.

'जुन्या GMC' इमारतीसमोर भव्य उद्घाटन

यंदाच्या इफ्फीची सर्वात विशेष बाब म्हणजे, उद्घाटन सोहळा प्रथमच पणजीतील जुन्या GMC इमारतीसमोर खुल्या जागेत (Open-Air) आयोजित केला जाणार आहे. महोत्सवाच्या या ओपन-एअर उद्घाटन समारंभात २३ चित्रपट-थीम असलेल्या फ्लोट्सचा सहभाग असेल, ज्यात गोव्यातील ११ फ्लोट्सचा समावेश आहे. सर्वोत्तम ५ फ्लोट्सला पारितोषिके दिली जातील.

जागतिक चित्रपट आणि विक्रमी सहभाग

यंदा महोत्सवाला १२७ देशांकडून विक्रमी २,३१४ अर्ज प्राप्त झाले आहेत. यंदाच्या चित्रपट महोत्सवात ८१ देशांतील २४० हून अधिक चित्रपट दाखवले जातील. यात १३ वर्ल्ड प्रीमियर, ४ आंतरराष्ट्रीय प्रीमियर आणि ४६ आशियाई प्रीमियर चित्रपटांचा समावेश आहे. यंदा ५० हून अधिक महिला दिग्दर्शकांच्या चित्रपटांचा समावेश महोत्सवात आहे.

दिग्गजांचा सन्मान आणि रजनीकांतचा गौरव

यंदाच्या इफ्फीची सुरुवात ब्राझीलचे प्रसिद्ध चित्रपट निर्माते गॅब्रिएल मास्कारो यांच्या 'द ब्लू ट्रेल' या साय-फाय (Sci-Fi) चित्रपटाने होणार आहे. या चित्रपटाला २०२५ च्या बर्लिन आंतरराष्ट्रीय चित्रपट महोत्सवात 'सिल्व्हर बेअर ग्रँड ज्युरी' पुरस्कार मिळाला आहे.

इफ्फीमध्ये यंदा १५ स्पर्धात्मक आणि क्युरेटेड सेगमेंटचा समावेश असेल, ज्यात आंतरराष्ट्रीय स्पर्धा, आयसीएफटी-युनेस्को गांधी मेडल आणि पुनर्संचयित क्लासिक्स यांचा समावेश आहे. चित्रपट निर्माते गुरु दत्त, राज खोसला, ऋत्विक घटक, पी. भानुमती, भूपेन हजारिका आणि सलील चौधरी यांचा विशेष सन्मान केला जाईल. सुपरस्टार रजनीकांत यांचा चित्रपटसृष्टीतील ५० वर्षांचा प्रवास पूर्ण झाल्याबद्दल समारोप समारंभात खास गौरव करण्यात येणार आहे.

इंडियन पॅनोरमा मध्ये २५ फिचर चित्रपट आणि २० नॉन-फिचर चित्रपटांचा समावेश असेल. फिचर गटात 'अमरान' आणि नॉन-फिचर गटात 'काकोरी' हे चित्रपट ओपनिंग फिल्म असतील.