Goa Weather Update: राज्यात मागील दोन-चार दिवसांपासून थंडी पडत आहे. ऐन नाताळ सणात थंडीला सुरवात झाल्याने आनंद द्विगुणित झाला आहे. पणजीतील किमान तापमानाचा पारा 21.4 अंश सेल्सिअस एवढा झाला होता. ग्रामीण भागासह शहरी भागातही मागील दोन दिवसांपासून थंडीला सुरवात झाली आहे.

गोवा वेधशाळेच्या अंदाजानुसार राज्यात पुढील चार-पाच दिवस राज्यातील हवामानात मोठे बदल घडणार नाहीत. हवामान कोरडे राहील, तर काही भागात पहाटे दव आणि धुके पडण्याची शक्यता वर्तविण्यात आली आहे. राज्यात सातत्याने होणाऱ्या हवामान बदलांमुळे नागरिक वैतागले होते.

मोठ्या प्रमाणात होणाऱ्या उष्म्यापासूनही आता थंडी पडू लागल्याने नागरिकांना दिलासा मिळाला आहे. यंदा खऱ्या अर्थाने आता थंडीला सुरवात झाली आहे. मागील महिन्याभरात राज्यातील घाटालगतच्या भागात काहीप्रमाणात थंडी जाणवत होती, परंतु कधी थंडी तर कधी उष्मा असा खेळ सुरू होता. आता राज्यात थंडीला सुरवात झाल्याने काही काळ का होईना उष्‍म्यापासून नागरिकांना दिलासा मिळत आहे.

उत्सव काळात उत्साह

राज्याच्या ग्रामीण भागात पडणाऱ्या कडाक्याच्या थंडीमुळे स्वेटर, गरम कपडे नागरिक परिधान करत आहेत तसेच ग्रामीण भागात शेकोटी पेटवून अनेक ठिकाणी नागरिक बसलेले दिसतात. राज्यात जत्रोत्सव, कालोत्सव तसेच दत्तजयंती, नाताळानिमित्त रात्रीचे विविध सांस्कृतिक, धार्मिक कार्यक्रम होत असल्याने थंडीमुळे उत्सवांचा उत्साह वाढत आहे.

खबरदारीची गरज

राज्यात वाढत असलेल्या थंडीमुळे अनेकजण आजारी पडत आहेत. कोरोनाची धास्ती वाढली आहे. त्यामुळे नागरिकांनी खबरदारी घेणे जरुरीचे आहे. शक्यतो पाणी उकळून प्यावे, तेलकट पदार्थ, थंडपेय, आइस्क्रीम, तसेच बाहेरचे अन्न खाणे शक्यतो टाळावे असा सल्ला डॉक्टर देत आहेत.