पणजी : शुक्रवारी सकाळी सातच्या सुमारास गोव्याहून हैदराबादकडे निघालेली खासगी बस आणि ट्रक यांच्यात धडक झाली. धडकेने बस पुलावर आदळली आणि तिने अचानक पेट घेतला. परिणामी सर्व प्रवाशी बसमध्येच अडकले. प्रवाशांनी आरडाओरडा सुरू केला, पण काही मिनिटांतच संपूर्ण बस जळून खाक झाली. बसमध्ये तेलंगणाचे 35 प्रवासी होते. या अपघातात 2 वर्षीय विवानचा करूण अंत झाला. (Hyderabad bus accident goa)

या बसमध्ये अर्जुन आणि सरलादेवी हे आपल्या कुटुंबातील 30 सदस्य, मित्र आणि शेजाऱ्यांसह आपला मुलगा विवान याचा वाढदिवस साजरा करण्यासाठी 29 मे रोजी गोव्यात आले होते आणि 2 जून रोजी संध्याकाळी ते गोव्याहून परतीच्या मार्गावर होते. पण परतताना त्यांच्यावर काळाने झडप घातली. वाढदिवस साजरा करण्यासाठी आलेला विवान अपघाताला बळी पडला.

अर्जुन (वय 34), सरलादेवी अर्जुन (32), विवान अर्जुन (2 वर्षे), शिवकुमार (35), रावली शिवकुमार (30), दीक्षित शिवकुमार (9 वर्षे) आणि अनिता राजू (40) अशी मृत प्रवाशांची नावे आहेत. ते सर्वजण तेलंगणातील सिकंदराबाद येथील रहिवासी आहेत.