पिसुर्ले: सुमारे ३२ वर्षांपूर्वी उभारण्यात आलेली होंडा पंचायत मालकीची व्यावसायिक इमारत जीर्ण व धोकादायक झाल्याने ती पाडण्याचे आदेश उत्तर गोवा जिल्हाधिकाऱ्यांनी दिले आहेत. त्यानुसार वाळपई गटविकास अधिकाऱ्यांच्या मार्गदर्शनाखाली २२ जूनपासून पाडकामाची प्रक्रिया सुरू होणार असल्याची माहिती पंचायत सूत्रांनी दिली.

पंचायतीला आर्थिक उत्पन्न मिळावे या उद्देशाने १९९४-९५ दरम्यान वाळपई-होंडा मार्गालगत पंचायत मालकीच्या जागेत तीन मजली प्रशस्त इमारत उभारण्यात आली होती. पंचायत संचालनालयाच्या योजनेअंतर्गत कर्ज स्वरूपात निधी घेऊन ही इमारत बांधण्यात आली होती. तळमजल्यावर व्यावसायिक गाळे, तर पहिल्या व दुसऱ्या मजल्यावर निवासी अथवा कार्यालयीन गाळ्यांचे नियोजन करण्यात आले होते.

मात्र, बांधकामानंतर इमारतीची आवश्यक देखभाल वेळोवेळी न झाल्याने काही वर्षांतच तिची अवस्था खालावली. तळमजल्यावरील गाळ्यांमधून पंचायतीला काही प्रमाणात भाडे उत्पन्न मिळाले; परंतु वरच्या दोन मजल्यांचा अपेक्षित वापर न झाल्याने त्यातून कोणताही विशेष आर्थिक लाभ मिळू शकला नाही. परिणामी लाखो रुपये खर्चून उभारलेली ही इमारत पंचायतीसाठी अपेक्षित उत्पन्नाचे साधन ठरू शकली नाही.

सार्वजनिक बांधकाम खात्याच्या इमारत विभागाने काही वर्षांपूर्वीच ही इमारत धोकादायक असल्याचा अहवाल दिला होता. तरीही पाडकामाची कारवाई लांबणीवर पडली होती. त्यामुळे परिसरातील दुकानदार, ग्राहक तसेच शेजारील खासगी शाळेतील शेकडो विद्यार्थ्यांच्या सुरक्षेचा प्रश्न निर्माण झाला होता. आता इमारत पाडण्याचा निर्णय झाल्याने संभाव्य धोका टळणार आहे. पाडकामाच्या पार्श्वभूमीवर इमारतीतील सर्व दुकाने बंद करण्यात आली असून त्यामुळे संबंधित दुकानदारांना आर्थिक फटका बसला आहे.

...अत्याधुनिक प्रकल्प!

या जागेवर आधुनिक सुविधांनी युक्त नवी इमारत उभारण्याचा संकल्प आमदार डॉ. दिव्या राणे यांनी केला असून नव्या इमारतीचा आराखडा तयार करण्याच्या सूचना देण्यात आली आहे. प्रस्तावित इमारतीत तळमजल्यावर व्यावसायिक गाळे, पहिल्या मजल्यावर आरोग्य उपकेंद्र व अन्य सुविधा कक्ष, तर वरच्या मजल्यावर प्रशस्त वातानुकूलित सभागृह उभारण्याचे नियोजन असल्याचे डॉ. राणे यांनी यापूर्वी जाहीर केले होते.