Honda Industrial Estate : पिसुर्ले,पर्ये मतदारसंघात येणाऱ्या होंडा औद्योगिक वसाहतीत सुविधांचा अभाव जाणवत असल्याने कामगार तसेच सर्वसामान्य नागरिकांना मनस्ताप सहन करावा लागत आहे.

सध्या या भागात परतीचा पाऊस पडत असल्याने औद्योगिक वसाहतीमधील गटार व्यवस्था कोलमडून गेली आहे. त्यामुळे आज पडलेल्या पावसामुळे औद्योगिक वसाहतीमधील सर्व पाणी रस्त्यांवरून वाहून नवनाथ मंदिराजवळ असलेल्या प्रिया नाटेकर यांच्या दुकानात व घरांत पाणी शिरून बरेच नुकसान झाले आहे.

या वसाहतीच्या प्रवेशद्वारावर काही दिवसांपूर्वी घडलेल्या भीषण अपघातानंतर या वसाहतीत बऱ्याच असुविधा असल्याचे प्रकरण समोर आले आहे.

यामध्ये संपूर्ण वसाहतीच्या परिसरात रात्रीच्यावेळी पथदीपांची व्यवस्था नसल्याने तेथे काळोखाचे साम्राज्य पसरले आहे. त्यात काही ठिकाणी असलेले पथदीप बऱ्याच दिवसांपासून पेटत नसल्याने कामगारांना रात्रपाळी करणे अवघड बनले आहे.

ही वसाहत काही प्रमाणात वरच्या भागात असल्याने पावसाळ्यात वसाहतीतील संपूर्ण पाणी होंडा - वाळपई दरम्यानच्या रस्त्यांवरून वाहत असते.

त्याचा परिणाम या रस्त्यावरून ये - जा करणाऱ्या वाहनांना तसेच नागरिकांना होत आहे. या वसाहतीच्या प्रवेशद्वारासमोर प्रिया नाटेकर या महिलेचे घर असून औद्योगिक वसाहतीमधील सर्व पाणी रस्त्याच्या आरपार होऊन नाटेकर यांच्या घरात शिरत आहे.

समस्या सोडविण्याची मागणी

औद्योगिक वसाहतीजवळ घातलेल्या गतिरोधकामुळे संपूर्ण पाणी होंडा - वाळपई रस्त्यावर येत आहे. त्याचप्रमाणे या वसाहतीत गेल्या कित्येक दिवसांपासून पथदीप पेटत नाहीत.

यासंबंधी कोणीच दखल घेत नाही. याचा त्रास रात्रीच्यावेळी कामावर जाणाऱ्या कामगारांना होत आहे. या प्रकरणी औद्योगिक वसाहतीच्या अधिकाऱ्यांनी तातडीने लक्ष घालून ही समस्या सोडवावी, अशी मागणी होत आहे.