वाळपई: होंडा औद्योगिक वसाहतीतील ज्येष्ठ महिला शेवंती माईणकर यांच्या राहत्या घराला आज दुपारी साडेबारा वाजण्याच्या सुमारास अचानक आग लागून मोठे नुकसान झाले. या आगीत सुमारे १.६० लाखांचे साहित्य खाक झाले असून ५ लाखांची मालमत्ता वाचवण्यात यश आल्याची माहिती अग्निशमन दलाने दिली.

आगीचे कारण अद्याप अस्पष्ट असले, तरी ती घराच्या पाठीमागील स्वयंपाकघरातील खोलीत प्रथम आग लागून ती पुढे पसरली. त्यामुळे दोन्ही खोल्यांतील सर्व साहित्य, कपडे, कागदपत्रे, सोने, वासे, जळाऊ लाकडे आणि कौले पूर्णतः जळून गेली. सुदैवाने यावेळी कोणतीही जीवितहानी झाली नाही.

यावेळी मिळालेल्या माहितीनुसार, शेवंती माईणकर ही ज्येष्ठ महिला बाहेरच्या खोलीत झोपलेली असताना अचानक घराच्या मागच्या बाजूने आवाज आल्याने तिने तात्काळ धाव घेतली असता स्वयंपाकघरात आग भडकलेली दिसून आली. त्यांनी मदतीसाठी घराबाहेर धाव घेतली आणि आपल्या मुलीला व इतरांना हाक मारून मदतीची विनंती केली.

अग्निशमन दलाचे वाहन घराजवळ पोहोचू शकत नसल्याने, जवळच्या कारखान्यातील कामगारांनी आणि मालकीणबाईने पाण्याच्या पाइपलाइनचा वापर करून आग विझवण्याचा प्रयत्न केला.

त्यानंतर वाळपई अग्निशमन दलाने तेथील रामदेव प्लास्टिक फॅक्टरीच्या पाइपलाइनला आपल्या यंत्रणेची जोडणी करून उर्वरित आग आटोक्यात आणली. दरम्यान, या दुर्घटनेची माहिती आमदार डॉ. दिव्या राणे यांना मिळताच त्यांनी तत्काळ संपर्क साधून शेवंती माईणकर यांना सर्वतोपरी मदतीचे आश्वासन दिले आहे.