Borim Panchayat Gramsabha Meeting

बोरी: बोरी पंचायत क्षेत्रातील घरमालकांकडून भरमसाट घरपट्टी वसूल केली जाते. ही रक्कम सर्वसामान्यांना भरणे डोईजड होते, त्यामुळे ती निम्मी करावी, असा ठराव रविवारी झालेल्या ग्रामसभेत संमत करण्यात आला.

ही सभा सरपंच जयेश नाईक यांच्या अध्यक्षतेखाली पंचायत सभागृहात झाली. यावेळी उपसरपंच रश्‍मी नाईक, पंच सागर नाईक बोरकर, सतीश नाईक, किरण नाईक, सुशील बोरकर, विनय बोरकर, संगीता गावडे, दत्तेश नाईक व जिल्हा पंचायत सदस्य दीपक नाईक बोरकर होते.

सरपंच नाईक यांनी स्वागत केले. सचिव प्रदीप नाईक यांनी मागील सभेचा इतिवृत्तांत वाचून दाखवला व त्याला मान्यता घेण्यात आली.

या सभेत विविध विषयांवर चर्चा झाली. ही ग्रामसभा खेळीमेळीच्या वातावरणात पार पडली.या ग्रामसभेला मोठ्या संख्येने ग्रामस्थ उपस्थित होते. सरपंच जयेश नाईक यांनी आभार मानले.

विविध विषयांवर चर्चा

१. यावेळी गावातून जाणाऱ्या हमरस्त्याची तसेच सर्व अंतर्गत रस्त्याची दुरुस्ती करण्यात यावी असा ठराव घेण्यात आला.

२. रस्त्यांवर खोदकाम करून केबल तसेच पाइपलाइन घालण्याचे जे काम चालू आहे ते जलद गतीने करावे. तसेच खोदलेले चर दुरुस्त करून रस्ता वाहतूक सुरळीत केला जावा असे ठरवण्यात आले.

३. पंचायत क्षेत्रातील कचरा एकत्रित केला जातो, त्यासाठी कोमूनिदादकडून भूखंड घेऊन कचरा ठेवण्यासाठी शेड बांधण्याचे ठरविले. पूर्वी जी जागा बघितली होती ती जागा उपलब्ध करून घेण्यासाठी कोमूनिदादच्या पदाधिकाऱ्यांनी भेटून हा प्रश्‍न लवकरात लवकर सोडविण्याचे ठरले.

४. तसेच सार्वजनिक आरोग्य, वीज, पाणी आदी विषयांवर चर्चा करण्यात आली. ग्रामस्थांनी विचारलेल्या प्रश्‍नांना सरपंच जयेश नाईक यांनी समर्पक उत्तरे दिली.