Hill Top Goa : कळंगुट शिवोलीच्या आमदार दिलायला लोबो व हणजूण-कायसूव पंचायत मंडळ यांच्‍या सहकार्याने हणजूण हिलटॉप परिसर ते शापोरा किल्ला यादरम्‍यानचा परिसर सौरऊर्जेवर चालणाऱ्या दिव्यांनी प्रकाशमान करण्यात आला आहे.

या भागात दरवर्षी आयोजित करण्यात येत असलेल्या इनफिल्ड बुलेट कंपनीच्या सहयोगाने त्यांनी पुरस्‍कृत केलेल्या सीएसआर फंडामुळे या भागात हे दिवे बसविणे शक्य झाल्याचे आमदार लोबो यांनी सांगितले. हणजूण-कायसूव पंचायत मंडळाच्या सहकार्याने स्थानिक पंचायत क्षेत्रातील अनेक कामांना वेग देण्यात येणार आहे.

त्यामुळे येथील पर्यटनाला चालना मिळणार असल्याचे लोबो यांनी सांगितले. नैसर्गिक समतोल राखण्यासाठी अशा प्रकारची सोय संपूर्ण मतदारसंघात करण्याचा निर्धार असल्याचेही त्यांनी बोलून दाखविला. यावेळी हणजूण कायसूव पंचायत मंडळाच्‍या प्रतिमा गोवेकर, सुदेश पार्सेकर, दिनेश पाटील, सुरेंद्र गोवेकर, निकिता गोवेकर, माजी सरपंच ॲड. सुहासिनी गोवेकर, पंचसदस्य तसेच स्थानिक लोक मोठ्या संख्येने उपस्थित होते.