मडगावातील सोनसोडो कचरा व्यवस्थापन समस्या सोडविण्यासाठी पहिल्या टप्प्यात येत्या वर्षभरात प्रतिदिन 15 मेट्रिक टन बायोमिथेनेशन कचरा प्रक्रिया प्रकल्प उभारला जाईल, अशी माहिती मुख्यमंत्री डॉ. प्रमोद सावंत यांनी दिली.

सुमारे दोन वर्षांच्या कालावधीनंतर सोनसोडो घनकचरा व्यवस्थापनावरील उच्चाधिकार समितीची (एचपीसी) बैठक मुख्यमंत्र्यांच्‍या अध्‍यक्षतेखाली झाली. त्‍यात ते बोलत होते. यावेळी नगरनियोजनमंत्री विश्‍‍वजीत राणे, गोवा फॉरवर्डचे अध्यक्ष विजय सरदेसाई, आमदार आलेक्स रेजिनाल्ड लॉरेन्‍स उपस्थित होते.

मडगाव आणि परिसरात दररोज सरासरी ५० टन कचरा निर्माण होतो. त्यापैकी ३५ टन ओला कचरा आणि १५ टन सुका कचरा असतो. मडगाव नगरपालिका १५ टन कचरा प्रकल्पासाठी निधी आणि देखरेख करेल. तांत्रिक साहाय्य गोवा घनकचरा व्यवस्थापन महामंडळ आणि गोवा राज्य प्रदूषण नियंत्रण मंडळ प्रकल्पाच्या अंमलबजावणीची पाहणी करेल, असे मुख्‍यमंत्री म्‍हणाले.

पालिका पैसे गोळा करून गोवा राज्य कचरा व्यवस्थापन मंडळाकडे जमा करेल आणि मंडळाद्वारे निविदा जारी केली जाईल, असेही मुख्‍यमंत्र्यांनी सांगितले.

"सोनसोडोची कचरा समस्या दिवसेंदिवस गंभीर बनत चालली आहे. यासाठी कायमस्वरूपी आणि शाश्वत कचरा प्रकल्पाची नितांत गरज आहे. हा प्रकल्प उभारावा यासाठी प्रयत्नशील असून वर्षभरात या त्‍यावर विशेष काम केले जाईल."

डॉ. प्रमोद सावंत, मुख्‍यमंत्री