पणजी: अधिक परताव्याचे आमिष दाखवून गुंतवणूकदारांना १.६९ कोटींचा गंडा घातल्याप्रकरणी गोवा पोलिसांच्या आर्थिक गुन्हे शाखेने ‘हरीओम मल्टिस्टेट को-ऑपरेटिव्ह क्रेडिट सोसायटी लि.’चे माजी अध्यक्ष शिवाजी जाधव यांना अटक केली आहे.

पोलिसांनी दिलेल्या माहितीनुसार, २०१६ ते नोव्हेंबर २०२२ या कालावधीत या सोसायटीच्या पदाधिकाऱ्यांनी गोव्यातील नागरिकांना आरडी आणि मुदत ठेव (एफडी) योजनांमध्ये मोठी गुंतवणूक करण्यास प्रवृत्त केले. ‘तुमच्या पैशांवर भरघोस व्याज मिळेल, असे आश्वासन त्यांना देण्यात आले होते.

धक्कादायक बाब म्हणजे, या सोसायटीने आवश्यक नियामक परवानग्या न घेताच गोव्यात आपले कार्यालय थाटले होते. मुदत पूर्तीनंतर जेव्हा गुंतवणूकदारांनी पैसे परत मागितले, तेव्हा त्यांना मुद्दल किंवा परतावा काहीच मिळाले नाही. आपली फसवणूक झाल्याचे लक्षात येताच गुंतवणूकदारांनी पोलिसांत धाव घेतली.

...तर नागरिकांनी पुढे यावे!

आर्थिक गुन्हे शाखेने या सोसायटीत गुंतवणूक केलेल्या इतर नागरिकांना आवाहन केले आहे की, त्यांच्याकडे या प्रकरणाशी संबंधित काही कागदपत्रे किंवा माहिती असल्यास त्यांनी तपासात सहकार्य करण्यासाठी पुढे यावे. आम्ही या प्रकरणाचा सखोल तपास करत आहोत. आर्थिक व्यवहारांची कागदपत्रे तपासली जात असून, लवकरच या घोटाळ्यातील सर्व दोषींना समोर आणले जाईल.