डिचोली: डिचोली परिसरात सुरू असलेल्या मुसळधार पावसामुळे जनजीवन विस्कळीत झाले आहे. सावरधाट-लाटंबार्से येथे दुपारी मोठी दुर्घटना घडली. एका जुनाट फणसाचे झाड घरावर कोसळल्याने छपराचा पुढील भाग पूर्णपणे नुकसानग्रस्त झाला.

घटनेची माहिती मिळताच डिचोली अग्निशमन दलाने तातडीने घटनास्थळी धाव घेतली. लिडींग फायर फायटर अर्जुन धावस्कर यांच्या नेतृत्वाखाली जवानांनी झाड हटवण्याचे काम केले. नंतर जेसीबीच्या साहाय्याने ओंडके बाजूला करण्यात आले. दरम्यान, आमदार डॉ. चंद्रकांत शेट्ये यांनी घटनास्थळी भेट देऊन पाहणी केली आणि कुटुंबाला धीर दिला.

वृद्ध महिला थोडक्‍यात बचावली

या घटनेत घरातील वृद्ध महिला सखू वरक या ओसरीवर बसलेल्या असताना झाड कोसळले. सुदैवाने त्या थोडक्यात बचावल्या, मात्र कौलाचा तुकडा लागून त्यांना किरकोळ जखमी झाल्‍या. घरमालक प्रकाश वरक यांनी सुमारे दोन लाख रुपयांचे नुकसान झाल्याचा अंदाज व्यक्त केला आहे.