Mumbai Goa Highway Traffic Jam: गोवा आणि महाराष्ट्रात आज पहाटेपासून विविध ठिकाणी पावसाने हजेरी लावली आहे. सकाळी महाराष्ट्रात कोकण किनारपट्टी आणि पश्चिम महाराष्ट्रात विविध भागात जोरदार पाऊस पडला.

रत्नागिरीत देखील मोठा पाऊस पडल्याने चिपळूण येथील परशुराम घाटात भरावाचा चिखल रस्त्यावर आला आहे. त्यामुळे या मार्गावर मोठी वाहतुक कोंडी झाली आहे.

मुंबई-गोवा महार्गावर सकाळी पाच वाजल्यापासून वाहनांच्या मोठ्या रांगा लागल्या असून, प्रवासी ताटकळत थांबले आहेत.

सकाळपासून रत्नागिरीत मुसळधार पावसाने हजेरी लावली आहे. त्यामुळे मार्गालगत असलेली भरावाची माती परशुराम घाटात रस्त्यावर आली असून, चिखल झाला आहे. त्यामुळे मार्गावरील वाहने जागच्या जागी थांबली आहेत. सकाळपासून या मार्गावर मोठ्या वाहतूक कोंडीचा सामना प्रवासी आणि वाहनधारक करत आहेत.

तसेच, खेड आणि चिपळूण दोन्ही दिशेला मुंबई गोवा महामार्गावर ती आठ ते दहा किलोमीटर लांब वाहनांच्या रांगा लागल्या आहेत. दरम्यान, घाटातील चिखल बाजुला करण्यासाठी अजून काही अवधी लागण्याची शक्यता आहे.

या मार्गावर प्रवास करणाऱ्या प्रवाशांना विलंब लक्षात घेऊन प्रवास करावा अशी सूचना सध्या करयण्यात येत आहे. दरम्यान, शेकडो विविध प्रकारची वाहने अडकून पडल्याने वाहतूक चिरणे मार्गे वळवण्याचे प्रशासनाचे प्रयत्न सुरू आहेत.

येत्या दोन दिवसात गोवा आणि महाराष्ट्रातील विविध भागात पावसाचा इशारा हवामान विभागाने दिला आहे. काल दोन्ही राज्यात बहुतेक ठिकाणी ढगाळ वातावरण होते. तर, आज सकाळी अनेक भागात पावसाने हजेरी लावली.