म्हापसा : पावसाने म्हापसा शहरासह बार्देश तालुक्याला गुरुवारी दिवसभर झोडपून काढले. परिणामी, संततधार कोसळणाऱ्या पावसामुळे ओहोळ आणि नाले हे दुथडी भरुन वाहू लागले. त्यामुळे शेतात सर्वत्र पाणीच पाणी झाले. शिवाय सकाळी तासभर कोसळलेल्या या मुसळधार पावसामुळे खोर्ली-म्हापसा येथील उसपकर हॉटेलच्या समोरील जंक्शनवर सुमारे दोन फुट उंच इतका पाण्याचा स्त्रोत रस्त्यावरुन वाहू लागल्याने वाहतुकीवर परिणाम झाला.

या पाण्यामुळे रस्त्यावरुन वाहने हाकणे मुश्किल झाले. सकाळच्या वेळी पडलेल्या या मुसळधार पावसामुळे येथील स्थानिकांची दाणादाण उडाली. खोर्ली येथील जंक्शनला टेकूनच श्यामसुंदर कारेकर यांचे घर आहे. पावसाच्या पाण्याची पातळी वाढल्यास त्यांच्या घरात प्रतिवर्षी पाणी शिरते. या परिसरात अलिकडच्या काळात डोंगर उत्तरणीवर अनेक बांधकामे झाल्याने तिथे खणलेली माती, दगड धोंडे नाल्यात शिरतात व प्रवाहात बाधा आणतात.

त्याचप्रमाणे हॉटमिक्सिंगमुळे रस्त्यांची उंची वाढल्याने पाण्याची पातळी वाढते व या घरात पाणी शिरते. शिवाय काही गटारांची रुंदी कमी झाल्याने पावसाच्या पाण्याला रस्त्यावरुन प्रवाहित व्हावे लागते. परिणामी, कारेकर यांच्या घरात पाणी जाते. याविषयी पालिका व प्रशासनाकडे तक्रार करूनही काही उपयोग होत नसल्याचे घरमालक कारेकर यांनी सांगितले.

पाणी साचणे नित्याचेच

तार जंक्शनजवळील उड्डाणपुलाखाली बस्तोडाच्या दिशेने जाणाऱ्या रस्त्यावर पावसामुळे पाणी साचण्याचे प्रकार आता नित्याचेच बनले आहे. पाणी साचत असल्याने या मार्गाचा अवलंब करणाऱ्या वाहतूकदारांना विशेषतः दुचाकीस्वारांना याचा खूप त्रास सहन करावा लागतोय.