पणजी : हवामान खात्याने दिलेल्या अंदाजानुसार राज्यात गुरुवारी धुव्वाधार पाऊस बरसला. गुरुवारी सकाळी साडेसात वाजेपर्यंत संपलेल्या 24 तासांत राज्यात सरासरी 37.6 मिमी. पावसाची नोंद झाली असली तरी गुरुवारी सकाळपासूनच पावसाने जोर धरला. दुपारी केवळ दोनच तासांत सुमारे 60 मिमी. पावसाची नोंद झाली. त्यामुळे सर्वत्र जनजीवन विस्कळित होऊन वाहतुकीवरही विपरित परिणाम झाला. पुढील दोन दिवसही असाच मुसळधार पाऊस पडणार असून हवामान खात्याने सतर्कतेचा ऑरेंज अलर्ट बजावला आहे. (Monsoon in Goa)

दोन तासांत 59 मिमी. पाऊस

गोवा वेधशाळेने दिलेल्या माहितीनुसार, गुरुवारी सकाळी 11 ते 1 या दोन तासांत पणजी शहरात 59 मिमी. पावसाची नोंद झाली. राज्याच्या मध्य भागात निर्माण झालेल्या कमी दाबाच्या पट्ट्यामुळे राजधानी पणजीला पावसाचा तडाखा बसला. केवळ दोन तासांत मुसळधार पाऊस पडल्याने शहरात पूरसदृश परिस्थिती निर्माण झाली होती.

पणजीत गटारे साफसफाईचे नियोजनच केलेले नाही. महापालिकेकडे कर्मचाऱ्यांची कमतरता नाही, पण ते काम कुठे करतात तेच कळत नाही. मे महिन्यात आयुक्त, महापौर, मुख्य अभियंता रजेवर होते.

- उदय मडकईकर, माजी महापौर