डिचोली: गेल्या दोन दिवसांपासून पडणाऱ्या पावसाने सलग तिसऱ्या दिवशीही कहर केला. डिचोलीसह तालुक्यातील बहुतांश भागांत दमदार पाऊस पडला. जोरदार पावसामुळे सर्वत्र जनजीवन विस्कळीत झाले. विविध ठिकाणी झाडांची पडझड होताना आठवडी बाजारालाही पावसाचा तडाखा बसला.

पावसावेळी डिचोली अग्निशमन दलाच्या कार्यक्षेत्रात एका घरावर मिळून तीन ते चार ठिकाणी झाडांची पडझड झाली. मयते-अस्नोडा येथे एका घराची झालेली किरकोळ मोडतोड वगळता मोठे नुकसान झाले नाही, अशी माहिती डिचोली अग्निशमन दलाकडून मिळाली.

पिंपळवाडा-आमोणे, धुमासे आणि न्यूवाडा-पिळगाव येथे रस्त्यावर झाडे कोसळली. अग्निशमन दलाचे उपअधिकारी शिवाजी नाईक, हवालदार राजन परब आणि अर्जुन धावस्कर यांच्या नेतृत्वाखाली दलाच्या जवानांनी विविध ठिकाणी धाव घेऊन मदतकार्य केले.

चालक ऑपरेटर नीलेश हळर्णकर आणि कपिल गावस यांच्यासह रूपेश गावस, वासुदेव ताटे, गौरेश गावस, बाबुली मांद्रेकर, अमोल चोर्लेकर आदी दलाच्या जवानांनी मदतकार्य केले. सकाळपासूनच पावसाने जोर धरला होता. दुपारी तीन वाजेपर्यंत जोरदार पर्जन्यवृष्टी झाली. डिचोलीतील आठवडी बाजारावर मोठा परिणाम जाणवला.