वाळपई: मुसळधार पाऊस आणि जोरदार वादळी वाऱ्याने मंगळवारी सत्तरी तालुक्यात अक्षरशः धुमाकूळ घातला. अवघ्या एका दिवसात २७ ठिकाणी झाडे उन्मळून पडल्याने जनजीवन विस्कळीत झाले. अनेक रस्ते बंद झाले, तर वीजवाहिन्यांवर झाडे कोसळल्याने विविध भागांतील वीजपुरवठा खंडित झाला.

काही ठिकाणी झाडे घरांवर, गोठ्यांवर आणि वाहनांवर कोसळून मोठे नुकसान झाले. सकाळच्या वेळी रस्त्यावर झाडे पडल्याने शाळकरी विद्यार्थी, नोकरदार आणि प्रवाशांची मोठी गैरसोय झाली. काही नागरिकांना अडथळे पार करून पायी मार्गक्रमण करावे लागले.

गेल्या काही दिवसांपासून सुरू असलेल्या मुसळधार पावसामुळे जमिनीतील ओलावा वाढला असून, त्यात वादळी वाऱ्याची भर पडल्याने मोठी रानटी व फळझाडे कोसळण्याच्या घटना वाढल्या आहेत. परिणामी वाहतूक व्यवस्था तसेच वीजपुरवठ्यावर परिणाम झाला.

अग्निशमन दलाला सकाळपासून संध्याकाळपर्यंत २७ आपत्कालीन कॉल प्राप्त झाले. कर्मचाऱ्यांनी घटनास्थळी धाव घेत झाडे हटवून रस्ते मोकळे करण्याचे काम केले. वीज खात्याच्या कर्मचाऱ्यांनीही युद्धपातळीवर प्रयत्न करून वीजपुरवठासुरळीत करण्यासाठी काम केले. मात्र, सततच्या पावसामुळे नागरिकांमध्ये भीतीचे वातावरण निर्माण झाले आहे.

विविध ठिकाणी पडझडीच्या घटना

सोनाळ येथे रस्ता व वीजवाहिनीवर झाड कोसळून वाहतूक ठप्प.

धारखंड-धावे मार्गावर झाड पडून वाहतुकीस अडथळा झाला.

शांतीनगर, होंडा येथे झाड कोसळल्याने रस्ता बंद झाला.

म्हादई-अडवई येथे घरावर झाड पडून लाखोंचे नुकसान झाले.

अडवई-कुंभारवाड्यात झाड पडल्याने वीजपुरवठा खंडित झाला.

धावे-धनगरवाड्यात दूध संस्थेजवळ काजूचे झाड पडले.

उस्ते येथील सातेरी मंदिराजवळ झाड कोसळून मार्ग बंद झाला.

खोतोडा बिग बॉस गॅरेज परिसरात घरावर झाड पडले.

गोमळ-वेळगे येथे वीजवाहिनीवर झाड पडून नुकसान झाले.

विविध गावांत झाडे पडल्याने अनेक रस्ते बंद झाले.

पिसुर्ले येथे गटारात पडलेल्या गायीची अग्निशमन दलाने सुटका.

वाळपई आयआरबी कॅम्प परिसरात वाहनावर झाड पडून नुकसान.

होंडा व इतर भागांत शाळांजवळ झाडे पडून मार्ग बंद झाले.

औषध फवारणी रखडली!

सत्तरी तालुक्यात पावसामुळे बागायती पिकांचे नुकसान झाले असून सुपारी पिकावरील औषध फवारणीची कामे थांबली आहेत. जोरदार वाऱ्यामुळे सुपारीच्या झाडावर चढणे शक्य होत नसल्याने बागायतदार अडचणीत आले आहेत. जूनमध्ये पहिली फवारणी झाल्यानंतर आता दुसऱ्या फवारणीसाठी शेतकरी प्रतीक्षेत आहेत.