Container Overturned At Thivim: थिवी येथे रस्त्याच्या बाजूला अवजड कंटेनर कलंडल्याची घटना रविवारी पहाटे 4 च्या सुमारास घडली. अपघाताची माहिती मिळताच अग्निशामक दलाच्या जवानांनी कंटेनर चालकाला केबीनबाहेर काढले.

अपघातात चालक किरकोळ जखमी झाला असून चालकाचा ताबा सुटल्याने हा अपघात झाला. अपघातानंतर रस्त्यावर डिझेल गळती झाली होती. त्यावर कोलवाळ पोलिस व म्हापसा अग्निशामक दलाच्या जवानांनी माती टाकून वाहतूक सुरळीत केली. मात्र या अपघातामुळे वाहनचालकांना वाहतूक कोंडीला सामोरे जावे लागले.

याबाबत मिळालेल्या माहितीनुसार, गोव्यातून मुंबईच्या दिशेने जाण्याऱ्या अवजड कंटेनरचा कांसा थिवी चर्चजवळ अपघात झाला. कंटेनर चालकाचा ताबा सुटल्याने कंटेनर रस्त्याच्या बाजूला कलंडला.

या अपघातात कंटेनर ट्रेलरपासून अलग होऊन तलावाच्या बाजूला कलंडल्याने चालकाच्या हाताला व पायाला दुखापत झाली. अपघाताची माहिती मिळताच कोलवाळ पोलिस व अग्निशामक दलाचे जवान घटनास्थळी दाखल झाले.

जवानांनी मोहिम राबवित कंटेनर बाहेर काढला. जखमी चालकाला उपचारासाठी रुग्णालयात हलवण्यात आले. यावेळी रस्त्यावर डिझेल गळती झाली होती.

कोलवाळ पोलिस आणि म्हापसा अग्निशामक दलासह स्थानिक अधिकाऱ्यांनी रस्त्यावर सांडलेल्या डिझेलवर माती टाकून वाहतूक सुरळीत केली.