Vishwajeet Rane: दक्षिण गोवा जिल्हा इस्पितळात सर्वप्रकारच्या सोयीसुविधा उपलब्ध करण्याचा प्रयत्न सुरू आहे. सुविधा पुरवण्यात विलंब झाला आहे. मात्र, ज्या रुग्णांचा आजार अधिक किचकट आहे, त्यांच्या सखोल तपासणीसाठी त्यांना गोमेकॉ किंवा सुपर स्पेशालिटी ब्लॉकमध्ये पाठवावे लागते.

पुढील आठवड्यात मुख्यमंत्र्यांसोबत आरोग्य सेवेसंदर्भात चर्चा केली जाईल, असे मत आरोग्यमंत्री विश्‍वजीत राणे यांनी व्यक्त केले.

आमदार विजय सरदेसाई यांनी दक्षिण गोवा जिल्हा इस्पितळातील सोयीसुविधांसंदर्भात उच्च न्यायालयात याचिका सादर केली आहे. याबाबत आरोग्यमंत्री राणे म्हणाले की, प्रत्येकाला उच्च न्यायालयात याचिका सादर करण्याचा अधिकार असून कोणी कोणाला थांबवू शकत नाही. याचिका सादर केली म्हणून आरोग्यासंदर्भातील सर्व गोष्टी झटक्यात पूर्ण होत नाहीत.

यासंदर्भात पूर्वी मुख्यमंत्र्यांशी माझी चर्चा झाली होती. ज्या सोयीसुविधा जिल्हा इस्पितळात आवश्‍यक आहेत, त्यावर गंभीरपणे पुन्हा चर्चा केली जाईल.

सरकारी इस्पितळांवर जनतेचा विश्‍वास

फोंडा उपजिल्हा इस्पितळात रुग्णांना विविध सोयीसुविधा उपलब्ध केल्या आहेत. दक्षिण गोवा जिल्हा इस्पितळामध्येही अत्याधुनिक उपकरणे व सुविधा उपलब्ध करण्यासंदर्भात लवकरच मुख्यमंत्र्यांबरोबर चर्चा करून निर्णय घेतले जातील.

जनतेला आरोग्य सेवा व सुविधा देण्याचा तसेच त्यांच्या दारापर्यंत पोहोचून त्यांचा लाभ मिळवून देण्याचा सरकारचा प्रयत्न आहे.

जनतेचा सरकारी इस्पितळांवर विश्‍वास असल्याने मोठ्या प्रमाणात रुग्ण उपचारासाठी येतात. माझ्या वडिलांनी तसेच मी सुद्धा गोमेकॉत उपचार घेतले आहेत. लोकांना तज्ज्ञ डॉक्टरांमार्फत उत्तम उपचार देण्याचा प्रयत्न आहे, असे राणे म्हणाले.