मुरगाव: सध्या गोव्यात एक व्हिडिओ सोशल मीडियावर वेगाने व्हायरल होत आहे, ज्यामध्ये एक संतप्त माणूस पावसाच्या पाण्यात बसून अनोख्या पद्धतीने राज्य सरकारचा निषेध करताना दिसत आहे. हा माणूस चक्क पाण्यात लोळत आहे, बोंबाबोंब करत आहे आणि आपले म्हणणे सरकारने ऐकावे यासाठी गयावया करत आहे. या आंदोलनातून त्याने थेट मुख्यमंत्री डॉ. प्रमोद सावंत यांच्या राजीनाम्याची मागणी केली आहे.

नेमके काय आहे प्रकरण?

हे आंदोलन करणाऱ्या निनावी व्यक्तीच्या एका मित्राला अटक करण्यात आली आहे. पोलिसांकडून त्याला जामीन मिळत नसल्याने हा तरुण प्रचंड संतप्त झाला आहे. त्या व्यक्तीचे म्हणणे आहे की, कदाचित जामीन मिळाला देखील असता, पण कोणीतरी सरकारी वजन वापरून जामीन मिळण्यास अडथळा आणत आहे.

हा आंदोलक पुढे म्हणतो की, "जर एखाद्या बड्या किंवा प्रभावशाली व्यक्तीने काही चूक केली, तर ती पाठीशी घातली जाते. मात्र, सामान्य माणसाची छोटी चूक सुद्धा मान्य केली जात नाही." तो पोलिसांच्या अरेरावी आणि छळाचा आरोप करत आहे. त्याच्या मते, सामान्य माणूस पोलिसांच्या त्रासाला बळी पडत आहे आणि त्याला न्याय मिळत नाहीये.

मुख्यमंत्र्यांच्या राजीनाम्याची मागणी

आपल्या मित्राला जामीन न मिळाल्याने आणि सरकारी व्यवस्थेतील पक्षपातीपणाचा निषेध म्हणून हा तरुण पावसाच्या पाण्यात बसून हे आंदोलन करत आहे. "मुख्यमंत्री डॉ. प्रमोद सावंत यांनी त्वरित राजीनामा द्यावा," अशी मागणी त्याने या व्हिडिओतून केली आहे. सामान्य माणसाच्या हक्कासाठी आणि पोलिसांच्या मनमानी कारभाराविरोधात हे आंदोलन असल्याचे तो वारंवार सांगत आहे.