वास्को: पर्यावरणाला घातक ठरणारे सिंगल युज प्लास्टिक दैनंदिन जीवनातून हद्दपार करण्यासाठी गोवा वेस्ट मॅनेजमेंट कॉर्पोरेशन (Goa Waste Management Corporation|GWMC), मुरगाव पालिका (Mormugao Municipal Council) आणि ‘अर्ज’ (Anyay Rahit Zindagi) बिगर सरकारी संस्था यांच्या संयुक्त विद्यमाने आज ‘पोती’ या प्रकल्पाची सुरवात करण्यात आली. प्लास्टिक वापर रोखण्यासह लैंगिक हिंसाचार पीडित महिलांच्या हाताला हा प्रकल्प कामही देणार आहे.

आमदार दाजी साळकर यांनी या प्रकल्पाचे उदघाटन केले. यावेळी मुरगावचे नगराध्यक्ष गिरीश बोरकर, नगरसेविका शमी साळकर, नगरसेवक दिलीप बोरकर, गोवा कचरा व्यवस्थापन महामंडळाचे महाव्यवस्थापक नंदन प्रभुदेसाई उपस्थित होते. आमदार साळकर, नगराध्यक्ष बोरकर यांनी मनोगत व्यक्त केले. एचक्यू हॉटेल, प्रेझेंटेशन सोसायटी आणि वास्को लीगल एड सेल यांनी कापडी पिशव्यांसाठी जुने कपडे प्रदान केले.

दीड लाख पिशव्यांचे वाटप

ज्युलियाना यांनी सांगितले की, पोती प्रकल्प दरवर्षी सुमारे ३० हजार किलो सिंगल यूज प्लास्टिकचा वापर रोखेल आणि ५० हजार किलो वापरलेले कपडे वाया जाण्यास प्रतिबंध करेल. हा प्रकल्प २५ महिलांना रोजगार देईल. पाच महिन्यांत सुमारे दीड लाख कापडी पिशव्यांचे वाटप करण्यात येईल.

...असा राबविणार प्रकल्प

गोवा वेस्ट मॅनेजमेंट कॉर्पोरेशनने कियोस्क प्रदान केले आहे.

पालिकेने वास्को फिश मार्केटमध्ये प्रकल्पासाठी जागा दिली आहे.

‘अर्ज’ कडे जुने कपडे गोळा करून पिशव्या पुरविण्याची जबाबदारी आहे.

या प्रकल्पांतर्गत ४-आर (रिफ्यूज, रिसायकल, रिड्यूस, रियूज) धोरण.

प्लास्टिकचा वापर टाळण्यासाठी जुन्या, टाकाऊ कपड्यांचा पुनर्वापर करण्यात येणार आहे.