Goa Police: गुजरातमधील अहमदाबाद सिटी पोलिसांनी तयार केलेल्या ‘पथिक सॉफ्टवेअर’चा वापर गोवा पोलिस लवकरच करणार आहेत. या सॉफ्टवेअरमुळे हॉटेल व गेस्ट हाऊसमध्ये पर्यटक म्हणून राहणाऱ्या गुन्हेगारांचा शोध घेणे सोपे होणार आहे.

विदेशी पर्यटकांना सी फॉर्म भरणे सक्तीचे आहे. हॉटेल व गेस्ट हाऊसमालकांनी त्यांना तो 24 तासांत भरण्यास सांगावे. त्यामुळे बेकायदेशीर वास्तव्य करणाऱ्या विदेशी नागरिकांची माहिती मिळवण्यास पोलिसांना सोपे होणार आहे, अशी माहिती पोलिस महासंचालक जसपाल सिंग यांनी दिली.

आल्तिनो-पणजी येथील राजपत्रित अधिकाऱ्यांच्या सभागृहात राज्यातील हॉटेल व गेस्ट हाऊसमालकांना पथिक सॉफ्टवेअरची माहिती देण्यासाठी सिंग यांनी काल बैठक बोलावली होती. या बैठकीस हॉटेल व गेस्ट हाऊसचे मालक उपस्थित राहिले.

यावेळी त्यांनी हे सॉफ्टवेअर सुरक्षिततेच्या दृष्टीने किती महत्त्वाचे आहे, याची माहिती दिली. हे सॉफ्टवेअर गुजरात पोलिसांनी निर्माण केले असून त्यांनी त्याचा वापर करण्यास सुरुवात केली आहे.