Goa Police : गोवा पोलिसांच्या चिंतेत भर टाकणारी बातमी समोर आली आहे. पोलिसांना दिला जाणारा ग्रुप इन्शुरन्स स्थगित करण्यात आला आहे. इतकंच नाही तर याबाबतचं धक्कादायक कारणही आता समोर आलं आहे. विमा कंपनीने हफ्ता वाढवल्यामुळे गोवा पोलिसांच्या विमा कवचाचं नुतनीकरण करण्यात आलेलं नाही.

गोवा पोलिस वेल्फेअर सोसायटीच्या निरीक्षकांनी एक पत्र जारी केलं आहे, ज्यामध्ये ग्रुप इन्शुरन्स स्थगित केल्याचं त्यांनी स्पष्ट केलं आहे. 2021-22 या वर्षासाठीचा मेडिक्लेम 28 जून 2022 रोजी संपला होता. मात्र त्यानंतर विमा कंपनीने हफ्त्याची रक्कम वाढवल्याचं कारण देत नुतनीकरणाकडे पोलीस प्रशासनाने पाठ फिरवल्याचं चित्र आहे. यामुळे जीवाची जोखीम पत्करुन कर्तव्य बजावणाऱ्या पोलिसांच्या आर्थिक सुरक्षिततेवरच प्रश्नचिन्ह उपस्थित झालं आहे.

मेडिक्लेम नुतनीकरण न केल्यामुळे सध्या पोलीस दलामध्ये नाराजीचं वातावरण आहे. नुतनीकरण रखडल्याचं पत्र सध्या सोशल मीडियावर चांगलंच व्हायरल होत आहे. यावरुन आता वातावरण तापण्याची शक्यता आहे. गोव्यात गृहखातं मुख्यमंत्री प्रमोद सावंत यांच्याकडेच असल्यामुळे मुख्यमंत्री या प्रकरणी काय निर्णय घेतात हे पाहणं आता महत्त्वाचं ठरणार आहे.