Goa News: गेल्या बारा वर्षांपासून खनिज खाणी बंद असल्याने या व्यवसायावर अवलंबून असलेल्या लोकांचे हाल झाले आहेत. त्यात भर म्हणून आता ग्रीन टॅक्स, जीपीएसचे पैसे भरणे आणि अन्य करांच्या भारामुळे ट्रकमालक मेटाकुटीला आले आहेत. तो भार त्वरित कमी करावा, अशी मागणी दक्षिण प्रोग्रेसिव्ह ट्रकमालक संघटनेने पत्रकार परिषदेतून केली आहे.

सावर्डे येथे घेतलेल्या पत्रकार परिषदेला संघटनेचे अध्यक्ष प्रकाश राऊत देसाई, कॅजिटन फर्नांडिस, सत्यवान गावकर व लक्ष्मण देसाई उपस्थित होते.

रस्ता वाहतूक खात्याकडून ट्रक फिटनेस सर्टिफिकेट घेण्यासाठी पंधरा वर्षांवरील ट्रकसाठी ग्रीन टॅक्स बराच वाढविला आहे. फिटनेस सर्टिफिकेटची मुदत संपली त्या दिवसापासून प्रतिदिवस पन्नास रुपये दंड आकारण्यात येत आहे तो त्वरित मागे घ्यावा, अशी मागणी यावेळी प्रकाश देसाई यांनी केली.

तोपर्यंत ट्रक पाठवू नये

पूर्वी जीपीएसचे पैसे खनिज वाहतूक सुरू असताना भरले जात होते व आता वाहतूक बंद असूनही वर्षाचे बाराही महिने पैसे विनाकारण भरावे लागत आहेत. तसेच ट्रकमालकांची वाहतूक दराविषयीची मागणी जोपर्यंत सरकार मान्य करीत नाही, तोपर्यंत एकाही ट्रकमालकाने खनिज वाहतुकीसाठी आपला ट्रक पाठवू नये, असे आवाहन फर्नांडिस यांनी केले.

ग्रीन टॅक्स व मुदत संपल्यानंतर दिवसाकाठी पन्नास रुपये दंडाविषयी खाण खात्याकडे लेखी निवेदन दिले आहे. खात्यातर्फे खास खनिज वाहतूक करणाऱ्या ट्रकसाठी एक योजना सुरू करणार असून त्याद्वारे ग्रीन टॅक्सचे व दिवसाकाठी पन्नास रुपये आकारले जातात ते त्यांना परत मिळणार असल्याचे खाण खात्यातर्फे सांगण्यात आले आहे. - कॅजिटन फर्नांडिस