National Games Goa 2023 : पणजी,राष्ट्रीय क्रीडा स्पर्धेच्या उद्‌घाटन सोहळ्याच्या तयारीत व्यस्त असतानाच क्रीडामंत्री गोविंद गावडे यांनी आज गुरुवारी वेळात वेळ काढून बांबोळी येथील गोमेकॉ इस्पितळाला भेट देऊन जखमी झालेल्या तीन खेळाडूंची विचारपूस केली.

गेल्या बुधवारपासून ताप आणि डोकेदुखीमुळे आजारी असलेल्या एका महिला खेळाडूची मंत्री गावडे यांनी गोमेकॉत भेट घेऊन विचारपूस केली.

आता तिला ताप नसून डॉक्‍टरांच्‍या निरीक्षणाखाली ठेवण्यात आले आहे. उद्या शुक्रवारी तिला डिस्‍चार्ज मिळेल अशी माहिती गावडे यांना तेथील वैद्यकीय कर्मचाऱ्यांनी दिली.

खेळताना अस्वस्थ वाटू लागल्याने उपचार घेत असलेल्या अन्‍य एका गोमंतकीय खेळाडूची गावडे यांनी भेट घेतली.

तसेच मुंबईच्या एका खेळाडूच्या पायाला फ्रॅक्चर झाल्याने त्याच्यावर तातडीने शस्त्रक्रिया करण्यात आली. त्‍याचीही त्‍यांनी भेट घेऊन विचारपूस केली.

तसेच या तिन्‍ही खेळाडूंना लवकर बरे होण्‍यासाठी शुभेच्‍छाही दिल्‍या.