खांडोळा: माजी मंत्री गोविंद गावडे यांचा बालेकिल्ला असलेल्या बेतकी-खांडोळ्यात १५०१३ मतदारांनी मतदान केले. त्यात पुरूष ७२२२, महिला ७५९१ यांचा समावेश होता. यंदा ८१.३२ टक्के मतदान झाले. हा वाढीव टक्का सत्तेविरोधात गेला.

त्यामुळे अपक्ष उमेदवार सुनील जल्मी २०९३ मतांची आघाडी घेऊन विजयी झाले. जल्मीना ८०८१, भाजप श्रमेश भोसले यांना ५९८८ तर आरजीचे विनय गावडे ८८०, ‘आप’चे शौनक कामत ७५ अशी मते मिळाली.

हा कार्यकर्त्यांचा विजय!

श्रमेशच्या प्रचारात मुख्यमंत्री डॉ. प्रमोद सावंत, प्रदेशाध्यक्ष दामू नाईक आणि स्वतः गोविंद गावडे सहभागी झाले होते. परंतु या नेत्यांचाही काही प्रभाव पडला नाही, उलट जल्मी यांच्यासोबत कोणत्याही पक्षाचा नेता नव्हता, फक्त कार्यकर्ते होते. गद्दार, शहाजहान सारखे आरोप-प्रत्यारोप प्रचारात सुरू होते, तरी मतदारांनी, माझ्या सर्वपक्षीय समर्थकांनी परिवर्तन घडवले. हा कार्यकर्त्यांचा विजय, असे जल्मी यांनी सांगितले.

बेतकी-खांडोळा झेडपी निवडणुकीचा निकाल हा केवळ उमेदवाराच्या विजयापुरता मर्यादित नाही, तर तो सध्याच्या आमदाराविरोधातील जनतेच्या नाराजीचेही प्रतिबिंब आहे. अनेकांच्या सकारात्मक पाठिंब्यापेक्षा नकारात्मक मतदानातून आपली भूमिका मांडली आहे, हे वास्तव नाकारता येणार नाही.

अभय गुरुनाथ कामत