देव दामोदराच्या कृपेने मला देशसेवा करण्याचे भाग्य लाभले. माझ्यासारख्या सामान्य कार्यकर्त्याला राज्यपाल पद मिळाले. त्या पदाचा मान सन्मान योग्यरित्या सांभाळणार असल्याचे प्रतिपादन हिमाचल प्रदेशाचे राज्यपाल राजेंद्र आर्लेकर यांनी केले. हिमाचल प्रदेशाचे राज्यपाल राजेंद्र आर्लेकर यांनी आज सोमवारी वास्को ग्रामदैवत दामोदराचे दर्शन घेतले. (Governor of Himachal Pradesh Rajendra Arlekar in Goa)

यावेळी जोशी कुटुंबातील प्रशांत जोशी, श्री दामोदर भजनी सप्ताह समितीचे अध्यक्ष जगदीश दुर्भाटकर तसेच इतर पदाधिकारी व नागरिक उपस्थित होते. श्री दामोदर मंदिराचे मुख्य पुरोहित भूषण जोशी यांनी या प्रसंगी श्रीचरणी सार्वजनिक सांगणे केले. पुढे बोलताना राज्यपाल आर्लेकर म्हणाले की देशात मुसळधार पावसामुळे बहुतेक ठिकाणी भूस्खलन होऊन जीवितहानी झाली असून, यामुळे अनेकांना मोठ्या प्रमाणात नुकसान झाले आहे. देव दामोदराने देशावर येणारे संकट दूर करावे अशी प्रार्थना राजपाल राजेंद्र आर्लेकर यांनी केली .

याप्रसंगी उद्योजक प्रशांत जोशी यांनी हिमाचल प्रदेश राज्यपाल राजेंद्र आर्लेकर यांनी गोवा पर्यटन उद्योगाचा विकास करण्यासाठी पुढाकार घ्यावा अशी मागणी केली. यावेळी प्रशांत जोशी यांच्या हस्ते राज्यपाल आर्लेकर यांचा गौरव करण्यात आला.