Bicholim Shigmotsav 2024 :

डिचोलीत यंदा येत्या शुक्रवारी (ता.२९) राज्यस्तरीय शिमगोत्सव साजरा करण्यात येणार असून शिमगोत्सव साजरा करण्यासाठी आयोजन समिती सज्ज झाली आहे.

पर्यटन खात्याच्या सहकार्याने साजरा होणाऱ्या या शिमगोत्सवानिमित्त चित्ररथ, रोमटामेळ, लोकनृत्य आणि वेषभूषा स्पर्धा आयोजित करण्यात आली आहे.

लोकसभा निवडणूक आचारसंहितेच्या मार्गदर्शक तत्त्वांचे पालन करून शिमगोत्सव साजरा करण्यात येणार आहे, अशी माहिती शिमगोत्सव समितीचे अध्यक्ष तथा डिचोली पालिकेचे मुख्याधिकारी सचिन देसाई, मामलेदार विमोद दलाल, दिलीप धारगळकर, डॉ. दिनेश आमोणकर, विश्वास गावस आदी समितीचे पदाधिकारी उपस्थित होते.

सायंकाळी ५ वा. बोर्डे वडाकडून शिमोगोत्सव मिरवणुकीला प्रारंभ होणार असून, भायली पेटमार्गे छत्रपती शिवाजी महाराज मैदानावर मिरवणुकीची सांगता होणार आहे.

बोर्डे येथील श्री वडेश्वर देवाला नारळ ठेवल्यानंतर देवाच्या प्रांगणातून शिमगोत्सव मिरवणुकीला सुरुवात होणार आहे.

स्पर्धेत सहभागी होणाऱ्या पथकांनी शुक्रवारी सायंकाळी ४ वाजेपर्यंत हजर राहणे बंधनकारक आहे.

आकर्षक रोख बक्षिसे

चित्ररथ स्पर्धा ः प्रथम- रोख ४५ हजार रुपये, द्वितीय-३० हजार रुपये, तृतीय-२५ हजार रुपये, चौथे-२० हजार रुपये, पाचवे-१५ हजार रुपये. याशिवाय सहभागी २० पथकांना ५ हजार रुपये मानधन देण्यात येईल. रोमटामेळ स्पर्धा ः प्रथम- रोख ३५ हजार रुपये, द्वितीय-२० हजार रुपये, तृतीय-१५ हजार रुपये, चौथे-१० हजार रुपये, पाचवे-९ हजार रुपये. याशिवाय सहभागी ६ पथकांना ५ हजार रुपये मानधन देण्यात येईल.

लोकनृत्य स्पर्धा ः

प्रथम- रोख १७ हजार रुपये, द्वितीय-१२ हजार ५०० रुपये, तृतीय-१० हजार रुपये, चौथे-८ हजार रुपये, पाचवे-५ हजार रुपये आणि प्रत्येकी ४ हजार अशी १० उत्तेजनार्थ बक्षिसे देण्यात येणार आहेत.

याशिवाय राज्य पातळीवरील लहान व मोठा गट तसेच डिचोली मर्यादित लहान व मोठा गट वेशभूषा स्पर्धेतील विजेत्यांना आकर्षक रोख बक्षिसे देण्यात येणार आहेत, अशी माहिती दिलीप धारगळकर यांनी दिली.