पणजी: सरकारी प्राथमिक व माध्यमिक विद्यालयांमध्ये सुरक्षारक्षक व स्वच्छक नेमण्यासाठी सरकार योजना तयार करेल. आवश्यक तेथे या महिन्यातच सुरक्षारक्षक व स्वच्छक नेमले जातील, असे आश्वासन मुख्यमंत्री डॉ. प्रमोद सावंत यांनी आज विधानसभेत दिले. मयेचे आमदार प्रेमेंद्र शेट यांनी याविषयी प्रश्न विचारला होता.

शेट म्हणाले, तारापूर येथे असलेल्या विठ्ठल-रखुमाई प्राथमिक विद्यालयात ३०४ विद्यार्थी आहेत. मराठी माध्यमाच्या या विद्यालयासाठी हरित इमारत सरकारने उपलब्ध करून दिली आहे. विद्यालयामध्ये ३२ खोल्या तर २१ स्वच्छतागृहे आहेत. त्यामुळे सुरक्षारक्षक व स्वच्छकांची गरज आहे. हायस्कूलमध्येही ३०० हून अधिक विद्यार्थी आहेत, तेथेही अशा कर्मचाऱ्यांची गरज आहे.

मुख्यमंत्री म्हणाले, या शाळांमध्ये सुरक्षारक्षक व स्वच्छक नेमले जातील. यासाठीची योजना तयार केली जाणार आहे. या महिन्याच्या अखेरपर्यंत सुरक्षारक्षक व स्वच्छक नेमण्यासाठी सरकार कटिबद्ध आहे. कुडचिरे येथे हायस्कूलमध्ये पुरेशी पटसंख्या आहे. मावळींगे येथील हायस्कूलमध्ये तर महाराष्ट्रातूनही विद्यार्थी शिकायला येतात. केवळ येथे उल्लेख झालेल्या शाळांमध्ये नव्हे तर सरकारी सर्व शाळांमध्ये सुरक्षारक्षक व स्वच्छक पुरवले जातील.