Government Scheme: लाडली लक्ष्मी योजनेतील पैशांचा योग्य विनियोग व्हावा, असे आवाहन मडकईचे आमदार तथा वीजमंत्री सुदिन ढवळीकर यांनी केले.

बांदोडा येथे काल योजनेच्या मंजुरी पत्रांचे वितरण लाभार्थींना देताना ते बोलत होते. यावेळी माधवराव ढवळीकर ट्रस्टचे विश्‍वस्त मिथिल ढवळीकर, जिल्हा पंचायत सदस्य गणपत नाईक उपस्थित होते.

मंत्री ढवळीकर म्हणाले की, ‘सरकारच्या माध्यमातून लोकांचेच पैसे लोकांपर्यंत पोचवण्याचा हा प्रयत्न असून मनोहर पर्रीकर यांच्या या योजनेची फलश्रुती आज दिसत आहे.’ स्वागत व प्रास्ताविक मिथिल ढवळीकर यांनी केले.

मार्चपर्यंत साडेतीनशे लाभार्थी...

येत्या मार्चपर्यंत साडेतीनशे लाभार्थींना लाडली लक्ष्मी योजनेचा लाभ मिळणार आहे. या योजनेचा लाभ घेताना विवाहित महिलांनी हे पैसे आपल्या मातापित्यांना द्यायचे, की स्वतःसाठी ठेवायचे हा निर्णय घ्यायचा आहे.

लग्न झाल्यानंतर लाडली लक्ष्मीचे पैसे पतीच्या हातात देण्याचे प्रकार बऱ्याच ठिकाणी घडले आहेत, त्यामुळे काही ठिकाणी वादही निर्माण झाले आहेत. लाडली लक्ष्मी योजना ही खरे तर मुलींच्या लग्नासाठी मातापित्यांसाठी आहे, त्यामुळे पतींनीही हे पैसे घेणे ठीक नाही, असे सुदिन ढवळीकर म्हणाले.