Bombay High Court At Goa News: मुंबई उच्च न्यायालयाच्या गोवा खंडपीठाचे निकाल आता कोकणी भाषेतूनही मिळणार आहेत. त्यामुळे गोमंतकीयांना याचा सर्वाधिक लाभ मिळणार आहे. यापुर्वी हे निकाल इंग्रजीसह मराठीतून उपलब्ध होत होते.

तथापि, कोकणी ही गोव्याची राजभाषा आहे. राज्य सरकार विविध मार्गांनी कोकणी भाषेचे संवर्धन, जतन करण्याचा प्रयत्न करत असते. त्यातून केलेल्या प्रयत्नांना यश आले असून आता हायकोर्टाचे निकाल देखील कोकणी भाषेतून उपलब्ध केले जाणार आहेत.

गोवा राजभाषा संचलनालयाच्या सहकार्याने या निकालांचे कोकणी भाषेमध्ये भाषांतर केले जाणार आहे.

सर्वसामान्य गोवेकरांना याचा मोठा लाभ होणार आहे. कारण गोव्यात कोकणी भाषिकांची संख्या मोठी आहे. येथील बोलीभाषेत बहुसंख्य नागरीक कोकणीचाच वापर करतात. तसेच कोकणीच्या संवर्धन, जतनासाठी येथे प्रयत्न होत असतात.

सध्या सुरू असलेल्या विधानसभेच्या पावसाळी अधिवेशनात देखील मुख्यमंत्री डॉ. प्रमोद सावंत यांनी कोकणी भाषा भवन बांधणार असल्याचा पुनरूच्चार केला होता. तसेच प्राचीन दस्तऐवज कोकणीत भाषांतरीत करणार असल्याचेही त्यांनी सांगितले होते.

दरम्यान, कोकणी भाषांतरकार मिळत नसल्यावरून त्यांनी खंतही व्यक्त केली होती.