Gold Theft Case: मागील काही दिवसात गोव्यात सोनसाखळी, दागिने चोरीच्या घटना वाढल्या आहेत. दागिने पॉलिश करून देण्याच्या बहाण्याने मंगळसूत्र चोरल्याच्या प्रकरणी जुने गोवा पोलिसांनी दोघांना ताब्यात घेतले आहे.

सोन्याचे दागिने पॉलिश करून देण्याच्या बहाण्याने जुने गोवेत एका महिलेचे 1.70 लाखांचे मंगळसूत्र लंपास करण्यात आल्याची घटना समोर आली आहे. याप्रकरणी पोलिसांनी विक्रम भागात (37, दिल्ली), मोहम्मद फिरोज (31, बिहार) यांना ताब्यात घेतले आहे.

मागील अनेक दिवसांपासून परिसरात चोरांची ही टोळी सक्रिय असून लोकांची फसवणूक सुरू होती. दागिने चमकवून देण्याच्या बहाण्याने त्यांनी अनेकांची लुबाडणूक करत दागिने चोरल्याचे सांगण्यात येत आहे. दरम्यान पोलीस यासंबंधीत पुढील तपास करत आहेत.

इथे पहा चोरट्यांचा व्हिडिओ :

अशीच एक घटना काही दिवसांपूर्वी कळंगुट किनाऱ्यावर घडली होती. यामध्ये कर्नाटकमधील पर्यटकाच्या गळ्यातील दोन सोनसाखळ्या अज्ञात चोरट्यांनी लंपास केल्या होत्या. याप्रकरणी कळंगुट पोलिसांनी चोरट्यांवर कारवाई करून त्यांना ताब्यात घेतले. त्यावेळी त्यांच्याकडून तुटलेल्या अवस्थेत सोन्याच्या चेन सापडल्या.