म्हापसा: गोवा अन्न आणि औषध प्रशासनाच्या वतीने रासायनिक पद्धतीने पिकवलेली केळी ठेवलेल्या गोदामाला ०९ जून रोजी टाळे ठोकण्यात आले. गोदामातील केळी देखील जप्त करण्यात आली. पण, गोदामाच्या मालकाने २४ तासांतच एफडीएने लावलेले सील तोडून जप्त केळी घेऊन फरार झाला. एफडीएच्या अधिकाऱ्यांनी तात्काळ गोदामाच्या मालकाला अटक केली आहे.

म्हापसा येथील गोदामात रासायनिक पद्धतीने केळी पिकवली जात असल्याची माहिती अन्न आणि औषध प्रशासनाच्या अधिकाऱ्यांना मिळाली होती. अधिकाऱ्यांनी गोदामावर धडक कारवाई करत केळी साठा जप्त करुन गोदामाला टाळे ठोकले. अन्न सुरक्षा कायदा २००६ अंतर्गत एफडीएने ही कारवाई केली.

दरम्यान, २४ तासांत गोदामाच्या मालकाने सील तोडून गोदामातील केळी टेम्पोत भरुन फरार झाला. एफडीएच्या अधिकाऱ्यांनी तात्काळ सतर्कतेने कारवाई करत मालकाला अटक केली. मालकाने केलेले कृत्य कायद्याचे गंभीर उल्लंघन आहे.

गोदामाचा मालक सध्या एफडीएच्या ताब्यात असून, पुढील कायदेशीर कारवाईसाठी त्याला म्हापसा पोलिसांच्या ताब्यात दिले जाणार आहे.