Nilesh Cabral: राज्याच्या सार्वजनिक बांधकाम खात्याने राज्यातील खड्ड्यांच्या समस्येवर मात करण्यासाठी आणलेल्या PWD Goa या अ‍ॅपवर काही तासातच नागरीकांकडून तक्रारींचा अक्षरशः पाऊस पडला आहे. राज्यातील जवळपास 15 ठिकाणांहून 260 नागरीकांनी रस्त्यातील खड्ड्यांचे फोटोज या अ‍ॅपवर अपलोड केले आहेत, अशी माहिती सावर्जनिक बांधकाम मंत्री निलेश काब्राल यांनी दिली. गुरूवारी या अ‍ॅपचे अनावरण झाले होते.

मंत्री काब्राल म्हणाले की, सार्वजनिक बांधकाम खात्यातील अधिकारी, कर्माचारी, कंत्राटदार या अ‍ॅपवर येणाऱ्या लोकांच्या तक्रारी सोडविण्यासाठी जबाबदार असतील. नवीन वर्षात या अ‍ॅपचा वापर नागरीकांना पाणी पुरवठ्याबाबतच्या तक्रारी, सांडपाण्याबाबतच्या तक्रारी, पाणी गळतीचे प्रकार यासाठीही करता येणार आहे. त्याचीही दखल खात्यातर्फे घेतली जाईल. याशिवाय लोकांना तक्रारीसाठी एक कायस्वरूपी दुरध्वनी क्रमांक उपलब्ध केला जाईल. अभियंत्यांनी लोकांच्या समस्या सोडविण्यासाठी 24 तास काम करावे, आणि शक्य नसल्यास राजीनामा द्यावा.

दरम्यान, नवीन झुआरी पुलाच्या उद्घाटन सोहळ्यात गुरूवारी केंद्रीय रस्ते वाहतूक मंत्री नितीन गडकरी यांच्या हस्ते PWD Goa या अ‍ॅपचे अनावरण झाले होते. या अ‍ॅपद्वारे रस्त्यातील खड्ड्यांची समस्या मिटविण्यात येणार आहे. हे अ‍ॅप गोवेकरांना डाऊनलोड करावे लागेल.

गोवेकरांनी रस्त्यातील खड्ड्याचा फोटो या अ‍ॅपमध्ये अपलोड करावा लागेल. त्यानंतर संबंधित रस्त्याचा कंत्राटदार सर्व यंत्रणा कामाला लाऊन तो खड्डा मुजवेल आणि त्या मुजवलेल्या खड्ड्याचा फोटो त्याच अ‍ॅपमध्ये पुन्हा अपलोड करेल. त्यानंतर कंत्राटदाराने केलेल्या कामाचे मुल्यमापन इंजिनियरमार्फत करण्यात येईल. अशा रितीने रस्त्यातील खड्ड्यांच्या समस्येवर कायमस्वरूपी उपाययोजना केली जाणार आहे.