Goa’s cricketer Mohit Redkar: गोव्याचा रणजीपटू आणि अष्टपैलू क्रिकेट खेळाडू मोहित रेडकरला 23 वर्षाखालील भारतीय 'अ' संघात स्थान मिळाले आहे. आशिया करंडक एकदिवसीय क्रिकेट स्पर्धेसाठी मोहितची राखीव संघात निवड झाली आहे. मोहित आणि अर्जुन तेंडुलकर यांची 23 वर्षाखालील भारतीय भारतील संघाच्या संभाव्य यादीत निवड झाली होती.

श्रीलंकेत होणाऱ्या या स्पर्धेसाठी बीसीसीआयने मंगळवारी (दि.04) या संघाची घोषणा केली.

बीसीसीआयने जाहीर केलेल्या 19 सदस्यीय संघात मोहित रेडकरला स्थान देण्यात आले आहे. या संघाचे नेतृत्व दिल्लीच्या यश धूल याच्याकडे देण्यात आले असून, उपकर्णधारपद पंजाबच्या अभिषेक शर्मा याच्याकडे देण्यात आले आहे.

रणजीत पदार्पण करत मोहितने अष्टपैलू खेळीने सर्वांचे लक्ष वेधून घेतले. मोहितने सात सामन्यात 19 बळी घेत 238 धावा कुटल्या होत्या. नावेली दिकरपाली येथील 22 वर्षीय मोहित भारतीय क्रिकेट संघात स्थान मिळवलेला गोव्याचा सहावा खेळाडू आहे.

श्रीलंकेत आशियाई क्रिकेट कॉन्फेडरेशनची एकदिवसीय स्पर्धा होत आहे. 13 ते 23 जुलै या कालावधीत होणाऱ्या या स्पर्धेत भारत, युएई, पाकिस्तान व नेपाळ असा एक तर, अफगाणिस्तान, बांग्लादेश, ओमान व श्रीलंका असा दुसरा गट आहे.

असा आहे भारतीय संघ

यश धूल (कर्णधार), अभिषेक शर्मा (उप-कर्णधार), निकीन जोस, प्रदोष रंजन पॉल, रियान पराग, निशांत सिंधू प्रभसिमरन सिंग (यष्टीरक्षक), ध्रुव जुरेल (यष्टीरक्षक), मानव सुथार, युवराजसिंग दोडिया, हर्षीत राणा, आकाश सिंग, नितीशकुमार रेड्डी, राजवर्धन हंगरगेकर.

राखीव- हर्ष दुबे, नेहाल वढेरा, स्नेल पटेल व मोहित रेडकर. सितांशू कोटक (मुख्य प्रशिक्षक), साईराज बहुतुले (गोलंदाजी प्रशिक्षक), मनीष बाली (क्षेत्ररक्षण प्रशिक्षक).