सासष्टी: भाजपच्या राजवटीत गोव्याचे नाव जगात बदनाम होण्यासारख्या घटना घडत आहे. जमीन हडप करणे, गुंडगिरी, चोऱ्या, दरोडे, कचऱ्याच्या राशी, बेकायदेशीर कामांसाठी हफ्ते घेणे, यासारखे प्रकार वाढले आहेत. सरकारचे कायदा व सुव्यवस्थेवर नियंत्रण राहिले नाही.

गोव्याचे अस्तित्व धोक्यात आहे, अशा परिस्थितीत आगामी जिल्हा पंचायत निवडणुकीत प्रामाणिक, मूळ गोमंतकीय, गोव्याचे अस्तित्व टिकवण्यासाठी धडपडणाऱ्यांना मत देण्याचे आवाहन मडगावात घेतलेल्या पत्रकार परिषदेत सामाजिक कार्यकर्त्यांनी गोमंतकीयांना केले. या वेळी गोमंतकीयांनी समजूतदारपणे व शहाणपणाने मतदान करणे ही काळाची गरज आहे, असे सांगण्यात आले.

या पत्रकार परिषदेला फा. इरेमितो माँत रेबेलो, प्रतिमा कुतिन्हो, राजदीप नायक, एन्थनी डिसिल्वा व इफ्तियाज हे समाज कार्यकर्ते उपस्थित होते.

भाजप इतर पक्षांतील आमदारांना आयात करून सरकार चालवत आहे, त्याच प्रमाणे घोटाळे वाढले आहेत,असे फा. इरेमितो रेबेलो यांनी सांगितले.

वेळ गेली नाही; जागे व्हा!

जिल्हा पंचायत निवडणूक ही २०२७ मधील विधानसभा निवडणुकीपूर्वीची उपांत्य फेरी आहे, असे सांगून नाट्यकलाकार राजदीप नायक म्हणाले की जगभर गोव्याची बदनामी झाली आहे. असे सरकार यापूर्वी गोव्यात सत्तेत नव्हते. आवाज उठविणाऱ्यांना गुंडांकरवी मारहाण होत आहे. अजून वेळ गेली नाही. सर्व गोमंतकीयांनी जागे होणे आवश्यक आहे, असे नायक म्हणाले.