पणजी: बिहार पोलिसांनी राहुल गांधी यांना ज्या प्रकारे मारहाण करून त्यांना आंबेडकर वसतिगृहातील विद्यार्थ्यांना भेटण्यास अटकाव केल्याप्रकरणाचा प्रदेश युवक काँग्रेसच्यावतीने निषेध केला.

काँग्रेस कार्यालयाबाहेर सकाळी प्रदेश युवक काँग्रेसच्यावतीने कार्यकारी अध्यक्ष महेश नदार यांच्या नेतृत्वाखाली निषेध आंदोलन केले. बिहार सरकारविरोधात घोषणाबाजी करीत युवकांनी निषेध नोंदविला.

नदार म्हणाले की, राहुल गांधी हे बिहारमधील आंबेडकर वसतिगृहात मागास विद्यार्थ्यांना भेटण्यास चालले होते, तेथे बिहार पोलिसांनी त्यांना अटकाव केला, हे घृणास्पद आहे.

राहूल गांधी हे अशाप्रकारच्या अटकावाला भीत नाहीत, ते आपली भूमिका सडेतोडपणे मांडतील. विद्यार्थ्यांचे काय म्हणणे आहे, हे जाणून घेण्यासाठी राहुल गांधी चालले असताना त्यांना अटकाव करणे कितपत योग्य आहे, असा सवाल महेश नदार यांनी केला. बिहारमध्ये झालेल्या प्रकाराविरोधात पोलिसांत तक्रार दाखल होईल, असेही नदार यांनी नमूद केले.