मडगाव: वीज वाहिनीला लोखंडी शिडीचा स्पर्श होऊन २१ वर्षीय कामगाराचा मृत्यू झाल्याची घटना कुंकळ्ळी पोलिस ठाण्याच्या हद्दीतील तिलोय, बाळ्ळी येथील एका नारळ फार्मवर बुधवारी सायंकाळी पावणे आठच्या सुमारास घडली. दिलीप सिंग असे मृताचे नाव असून, तो मूळचा झारखंड राज्यातील गुमला जिल्ह्यातील रहिवासी होता.

पोलिसांनी दिलेल्या माहितीनुसार, डिजॉय कोकोनट फार्ममध्ये ही घटना घडली. मृत तेथे कामगार म्हणून कार्यरत होता. परागीकरणाच्या कामासाठी तो लोखंडी शिडी घेऊन जात असताना शिडीचा वीज वाहिनीला स्पर्श झाला.

त्यामुळे त्याला विजेचा झटका बसून तो खाली कोसळला आणि बेशुद्ध पडला. त्यानंतर फार्मवरील अन्य सहकाऱ्यांनी त्याला १०८ रुग्णवाहिकेतून बाळ्ळी प्राथमिक आरोग्य केंद्रात नेले. मात्र, तेथील वैद्यकीय अधिकाऱ्यांनी त्याला मृत घोषित केले.

कुंकळ्ळी पोलिसांनी या प्रकरणाची अनैसर्गिक मृत्यू म्हणून नोंद केली आहे. पोलिस निरीक्षक डायगो ग्रासियस यांच्या मार्गदर्शनाखाली उपनिरीक्षक आदित्य सावंत पुढील तपास करीत आहेत. मृतदेह दक्षिण गोवा जिल्हा रुग्णालयाच्या शवागारात ठेवला आहे.